Сагсан бөмбөгийн домог Майкл Жордан NBA-гийн карьерын эхэн үедээ өмсөж байсан пүүз цахим дуудлага худалдаагаар 560,000 ам.доллароор зарагдаж, дээд амжилт тогтоосныг “Sotheby” дуудлага худалдаа зарлажээ.

Олон сая долларын үнэтэй урлагийн бүтээл борлуулдгаараа алдартай “Sotheby” компани зөвхөн пүүзэнд зориулсан анхны дуудлага худалдаагаа өнгөрсөн онд зохион байгуулж, “Сарны гутал” гэгддэг 1972 оны Nike загварын гүйлтийн гутлыг 437.500 ам.доллароор заран, дэлхийн дээд амжилт тогтоогоод байсан юм.

1985 онд Жорданд зориулан хийгдсэн, түүний гарын үсэг бүхий “Air Jordan 1” нь 100,000-150,000 ам.долларын үнэд хүрнэ гэж таамаглаж байсан ч өнгөрсөн ням гарагт болсон дуудлага худалдаагаар ийнхүү дээд амжилт тогтоогоод байна. Лас Вегас дахь “Shoezeum” пүүзний музейн үүсгэн байгуулагч, пүүз цуглуулагч Жордан Геллер эдгээрийг заржээ.

Уг пүүз Жорданы ихэнх пүүзнүүдтэй адил хоёр өөр хэмжээтэй буюу зүүн тал нь 46, баруун тал нь 46.5 размертай аж.

Мөн энэхүү дуудлага худалдаа нь “Air Jordan” брэнд үүссэний 35 жилийн ой болон Чикаго Буллз, Жорданы тухай ESPN-ийн 10 хэсэг “The Last Dance” баримтат кинотой давхацсан юм.

Эх сурвалж: The Guardian

---