Өнгөрсөн амралтын өдрүүдэд цаг агаарын гамшигт үзэгдэл болохыг ОБЕГ-аас анхааруулсан билээ. Тэгвэл Улаанбаатар,Дархан-Уул, Сэлэнгэ, Орхон, Төв аймгийн нутгаар бага зэргийн цас оржээ. Харин төвийн болон говь, зүүн аймгийн нутгаар хүчтэй шороон болон цасан шуурга шуурсан байна. Тавдугаар сарын 14-нд Баянхонгор аймгийн Бууцагаан сумын Өлзийт багийн Ёлхот гэдэг газар шороон шуурга шуурсны улмаас тус сумын харьяат малчин Ж-ийн бэлчээрт байсан 390 гаруй бог мал шуурганд урууджээ.

Дуудлагын дагуу тус аймгийн Онцгой байдлын газрын Бууцагаан сум дахь Гал түймэр унтраах, аврах 72 дугаар ангийн алба хаагчид эрэн хайх ажиллагаа эхэлж, үр дүнд хүрээгүй байна. Харин тавдугаар сарын 16нд цаг агаар тогтуун болсон тул малчид өөрсдийн хүчээр малаа эрэн хайж эхлээд байгаа гэнэ. Цаг агаарын нөхцөл байдал муудахтай холбогдуулан тавудгаар сарын 15-нд зүүн зүгийн хэд хэдэн аймгийн орон нутгийн замын хөдөлгөөнийг хаах шийдвэр гаргаж, өчигдөр замын хөдөлгөөнийг нээлээ. Мөн шороон шуурганы үеэр Улаанбаатар хотын Баянзүрх дүүргийн I хороонд байрлах "Алтан сан" хотхоны гадна талын хашаа өнгөрсөн баасан гарагийн шөнө нурж, долоон машин дарагдаж, иргэд эд хөрөнгөөрөө хохирсон хэрэг гарсан байна.

---