Эрүүл мэндийн яамны 11 цагийн ээлжит хэвлэлийн бага хурал боллоо. Монгол улсад коронавирусийн 135 тохиолдол илэрч, 20 хүн эдгээд байгаа билээ. Өнөөдрийн хэвлэлийн хурлаар дахин нэг хүн эдгэсэн талаар мэдээллээ.

ХӨСҮТ-ийн дарга Д.Нямхүү: 

-ХӨСҮТ-д 204 хүн эмчлүүлж байна. 115 нь эмчилгээнд, 89 нь ажиглалтад байна. Нэг оюутан эдгэж, 14 хоногийн сувилал руу шилжлээ. Турк улсын хоёр иргэн сувиллаас гэртээ харьсан. ХӨСҮТ болон Дархан-Уул аймгийн лабораторит 156 давтан шинжилгээ хийсэн. Орхон-9, Сэлэнгэ-9, Дархан-Уул-92 хүнд давтан шинжилгээ хийхэд коронавирус илрээгүй. 

ОХУ-аас ирж, халдвартай нь тогтоогдсон сонсогчдын 80 хувь нь хөнгөн хэлбэрээр өвчилсөн гэж бид үзэж байгаа. Нэг өвчтөний биеийн байдал тааруу байгаа. Амьсгалын аппараттай, уушгины 80 хувь нь ажиллагаатай байна. 

---