БНАСАУ-ын тагнуулын алба болон Ким Жон Уны аюулгүй байдлыг хариуцсан газрын дарга нар халагдсан тухай эх сурвалж мэдээлжээ.

Жан Кил Сон нь Умард Солонгосын цэргийн тагнуулын алба болох Тагнуулын ерөнхий товчооны дарга юм. Түүнийг огцруулсан явдал нь залуу удирдагчийн байр суурь нууцлаг байгаа энэ үед гарч буй томоохон өөрчлөлт, эргэлт хэмээн мэдээлж байна.

Ёнхап агентлагийн дамжуулснаар армийн генерал Рим Кван Ил Тагнуулын ерөнхий товчооны шинэ даргаар томилогджээ. Үүнээс гадна 2010 оноос хойш удирдагч Кимийн аюулгүй байдлыг хамгаалах албыг удирдаж ирсэн Юн Жон Ринийг халж, оронд нь дээд гвардын командлагч Квак Чан Сикийг томилсон хэмээн Korea Herald мэдээлэв.

Ким Жон Ун олон нийтийн өмнө гаралгүй томоохон арга хэмжээнүүдийг тэмдэглэлгүй өнгөрөөсний дараа тавдугаар сарын 1-нд тууз хайчлах ёслолд оролцсон тухай төрийн мэдлийн телевизээр дамжуулсан юм. Энэ өдрөөс хойш хоёр долоо хоногийн хугацаанд дахин олон нийтийн өмнө гараагүй нь өрнөдийнхний анхаарлыг татсаар байна.

Эх сурвалж: New York Post

---