ОХУ-ын Бүгд Найрамдах Халимаг Улсын нийслэл Элст хотод саяхан эрчимт эмчилгээнээс ерөнхий тасагт шилжсэн коронавирусийн халдвартай нэгэн өвчтөн тагтан дээрээс үсрэн, эмнэлгээс зугтах гэж оролдсон талаар тус улсын Эрүүл мэндийн сайд Юрий Кикенов мэдэгдэв.

"Тэр Холливудын шилдэг адал явдалт кинонуудын уламжлалаар зугтсан. Тэрээр эгэмний доорх гуурсаа суга татан аваад, эмч, сувилагч нарыг түлхэн, тагтан дээр гараад доош үсэрсэн" хэмээн Кикенов Эрүүл мэндийн яамны шууд дамжуулалтаар мэдээлжээ.

Хагалгаанд орсон байсан өвчтөн тагтны хаалгыг эвдэн гарахдаа биеэ зүссэн ч эрүүл мэндэд нь ноцтой аюул учруулах гэмтэл аваагүй гэв.

Өнөөдрийн байдлаар Халимагт коронавирусийн 534 тохиолдол бүртгэгдэж, 149 хүн эдгэн, зургаан хүн нас бараад байгаа юм.

Эх сурвалж: Риа Новости

---