Эрүүл мэндийн яамны 11 цагийн ээлжит хэвлэлийн бага хурал боллоо. 

Европ тивд халдварын тоо буурч, тогтвортой байгаа боловч тус тивийн зүүн хэсэг болох Беларус, Украйн, ОХУ-д  халдварын тоо буурахгүй байна. Тухайлбал, ОХУ-д өчигдөр 11 000 шинэ тохиолдол бүртгэгдэж, нийт 209 мянга хүн халдвар аваад байна. Мөн өнгөрсөн 24 цагийн дотор 88 хүн нас барлаа. 

Халдвартай хүний тоогоор АНУ тэргүүлсэн хэвээр байна. Төрсөн өдрийн арга хэмжээнд очсон хүмүүсээс халдвар тархсан тохиолдол бүртгэгдсэн нь олон хүн цуглаж болохгүйг дахин сануулж байна. БНСУ-д шинээр 33 тохиолдол шинээр бүртгэгдлээ. 

Сингапур, БНХАУ, БНСУ улсуудад сүүлийн гурван өдөрт халдварын тоо нэмэгдэж байгаа нь санаа зовоож байна. Вирусийн хоёр дахь давлагаа эхэлж байна уу гэж дүгнэхэд хүргэж байна. 

Харин ХӨСҮТ-өөс өгсөн мэдээллээр нийт 42 тохиолдол бүртгэгдсэнээс, 14 нь эмчлэгдэн гарсан. Өнгөрсөн 24 цагийн байдлаар шинэ тохиолдол бүртгэгдээгүй. 28 тохиолдлын хоёроос бусдынх нь биеийн байдал хэвийн, тогтвортой. Хоёр иргэний биеийн байдал хүндэвтэр байгаа. 

ХӨСҮТ-д байгаа 107, Алтанбулагийн хилийн боомтоор орж ирэн Дарханд тусгаарлагдаад байгаа 25 жолоочоос танадалтын шинжилгээ авахад коронавирус илрээгүй. Ер нь өдөрт 200 орчим хүнээс түүврийн аргаар танадалтын шинжилгээ хийж байгаа. 

-Бельгиэс халдвар авч ирсэн иргэний биеийн байдал ямар байгаа вэ? 

-Гаднаас вирусийн халдвар аваад ороод ирсэн хүн биш л дээ. Шинж тэмдэггүй, балархай хэлбэрийн халдвартай хүн байсан. Гадаадад байхдаа халдвар авсан. Энд байх хугацаандаа ямар нэгэн хүнд халдаагаагүй. Ойрын хүмүүсээс нь халдвар илрээгүй. 

---