ХБНГУ-д коронавирусийн халдварын тохиолдол өссөөр байгаа ч эрх баригчид эдийн засгаа сэргээхийн тулд хорио цээрийн дэглэмийг суллаж байна. Тус улсад Ковид-19-р ням гарагийн байдлаар 169,218 иргэн халдварлаад байсан бол өнөөдөр 171,879 болж өссөн ба 200 иргэн нэмж нас барснаар нийт эндэгдэл 7,569 болжээ.

Хэдийгээр халдвар намжаагүй ч өнгөрсөн бямба гарагт олон мянган иргэн гадаа гудамжинд цуглаж, хорио цээрийг хэсэгчлэн суллах биш бүрмөсөн арилгахыг шаардан жагссан байна. Канцлер Ангела Меркель өнгөрсөн долоо хоногт 16 мужийн захирагч нартай хэлэлцэж хорио цээрийг сулруулах шийдвэр гаргасан.

Бүх дэлгүүр, худалдааны төвүүдийг нээсэн ба сурагчид хичээлдээ эргэн орж, хөлбөмбөгийн дээд лигийн тоглолтыг ирэх амралтын өдрүүдэд эхлүүлэх шийдвэрт хүрсэн билээ. Гэсэн ч иргэд илүү түргэн хугацаанд хорио цээрийг суллах ёстой хэмээн шаардаж байна.

Харин иргэдийн зарим нь хорио цэрийн дэглэмийг сулруулах нь халдварын хоёр дахь давлагааг эхлүүлэх өндөр эрсдэлтэй гэж сэрэмжлэн, Меркелийн шийдвэрийг эрс шүүмжилж байгаа юм.

Эх сурвалж: BBC 

---