АНУ-д өнгөрсөн долоо хоногийн хугацаанд 3,2 сая иргэн шинээр ажлын байраа алдсанаа баталж, тэтгэмж хүсчээ. Тус улсад коронавирусийн халдварын анхны тохиолдол илэрч, ихэнх мужид хөл хорио, хорио цээрийн дэглэм хэрэгжүүлж эхэлсэн гуравдугаар сараас хойш нийт 33,3 сая иргэн ажлын байраа алдсан байна.

Энэ нь Нэгдсэн улсын нийт ажиллах хүчний 20 орчим хувьтай дүйцэж байна. Хөдөлмөрийн яамнаас долоо хоног бүр ажилгүйчүүдийн эгнээнд шилжиж буй иргэдийн тоо баримтыг танилцуулж байгаа юм.

Хэдийгээр Ерөнхийлөгч Дональд Трампын төлөвлөснөөр эдийн засгаа эргэн сэргээж эхлээд байгаа ч ажилгүйдлын тоо үргэлжлүүлэн нэмэгдэх хандлагатай байгаа ажээ. Uber, Lyft, Airbnb зэрэг томоохон компаниуд ойрын долоо хоногуудад цомхотгол хийж, бизнесээ аврахын тулд ажлын байр, зардлаа танаж байна.

Өнөөдөр эдийн засагчид дөрөвдүгээр сарын ажилгүйдлын түвшинг танилцуулах ёстой бөгөөд урьдчилсан таамгаар өнгөрсөн сард ажилгүйдлын түвшин хэвийн үеийнхээс 15 болон үүнээс илүү хувиар өссөн гэж таамаглажээ. Цар тахал тархаж эхлэхээс өмнө буюу ердөө хоёр сарын өмнө тус улсад ажилгүйдлын түвшин 3,5 хувьтай, 50 жилийн хугацаанд хамгийн бага түвшиндээ хүрсэн байжээ.

Эх сурвалж: ВВС  

---