ОХУ-д орон сууц болон тэдгээрийн ойролцоо байрладаг жижиг хоолны газруудад согтууруулах ундаа худалдахыг хориглосон хууль хүчин төгөлдөр болсон талаар Холбооны Зөвлөлийн Нийгмийн бодлогын хорооны орлогч дарга Валерий Рязанский мэдэгдлээ.

Тэрээр “Би энэ хуульд санаатайгаар гарын үсэг зурсан. Энэхүү хориг бол эрүүл амьдралын хэв маягийн төлөөх бид бүгдийн тэмцлийн нэг хэсэг” гэв.

Тус улсад тавдугаар сарын 5-ны өдрөөс эхлэн орон сууцны барилгын нэгдүгээр давхарт байрлах “наливайка” гэх жижиг баар, кафед архи, согтууруулах ундаа зарахыг хоригложээ. 20 метр квадратаас бага талбайтай барилга байгууламжид согтууруулах ундаа худалдаалахыг мөн хориглосон байна.

Энэхүү хууль тогтоомжийн шалтгаан нь иргэдээс ирсэн санал гомдлоос үүдсэн байж болзошгүй. Согтууруулах ундаагаар үйлчилдэг эдгээр газруудаас болж,  хөл хөдөлгөөн ихсэж, иргэдийн амар тайван байдалд саад учруулж эхэлсэн гэсэн мэдээлэл байна.

Уг шийдвэр гарахаас өмнө Оросын Эрүүл мэндийн сайд Михаил Мурашко хөл хорионы үеэр оросуудын согтууруулах ундааны хэрэглээ 2-3 хувиар нэмэгдсэн гэж мэдэгдэж байсан. Гэвч эсрэгээрээ, Роскачествогийн хийсэн судалгаагаар тэдний санал асуулгад хамрагдсан иргэдийн бараг тал хувь нь цар тахлын үеэр согтууруулах ундааны хэрэглээгээ багасгасан гэж мэдүүлжээ.

Эх сурвалж: iz.ru

---