Хөрш зэргэлдээ орнууд болох Австрали, Шинэ Зеланд хоёр транс-Тасманы “аяллын бөмбөлөг” үүсгэн хоорондын хилээ нээхээр төлөвлөж байна хэмээн Шинэ Зеландын Ерөнхий сайд Жакинда Ардерн мягмар гарагт мэдэгдэв.

Австралийн засгийн газартай коронавирусийн талаар хийсэн цахим хуралдааны дараах хэвлэлийн бага хурлын үеэр тэрээр ийнхүү хэлжээ. Түүнийг уг уулзалтад Австралийн Ерөнхий сайд Скотт Моррисон хоёр улс хэрхэн хамтарч ажиллах талаар ярилцахаар урьсан аж.

Коронавирусийн дэгдэлтийн улмаас хоёр орон гуравдугаар сард хилээ хаасан нь тус тусын аялал жуулчлалын салбарт нь сөргөөр нөлөөлсөн. Харин одоо халдварын тархалт тодорхой хэмжээгээр хяналтад ороод байгаа тул хоёр улсын удирдагчид энэхүү хязгаарлалтыг зогсоохыг эрмэлзэж байгаа юм.

"Аялал жуулчлал дахин нээгдсэнээр бид бүгдэд ашиг тустай байх болно. Гэр бүл, найз нөхөд Тасманаар тархсан байдаг. Гэхдээ мэдээж хоёр орны аюулгүй байдал нэн түрүүнд тавигдах болно" хэмээн Жакинда Ардерн сэтгүүлчдэд хэлжээ.

Хэдийгээр хоёр орон хоорондын хилээ нээхээр тохиролцоод байгаа ч олон улсын аялал жуулчлалыг нээх нь нэлээд хол байгаа юм.

Шинэ Зеландад коронавирусийн шинэ тохиолдол илрээгүй хоёр дахь өдөр тохиож байна. Тус улсад нийт 1,486 халдварын тохиолдол бүртгэгдэж, 20 хүн нас барсан. Харин Австралид 6,800 тохиолдол бүртгэгдэж, 96 хүн нас баржээ. Эдгээр хоёр улсад нас баралтын түвшин ердөө нэг хувьтай байгаа бөгөөд эмнэлгийн хэрэгслийн нөөцөө нэмэгдүүлсээр байгаа аж.

Эх сурвалж: dw.com

---