Өөрийг нь хүчиндэх гэж оролдсон эрэгтэйн хэлийг тас хазсан хэргээр 56 жилийн өмнө ял сонсож байсан БНСУ-ын нэгэн эмэгтэй давж заалдахаар болжээ.

Өдгөө 74 настай Чой Мал Жа гэгч тэрээр зөвхөн аргагүй хамгаалалт хийсэн гэж байгаа бөгөөд тэр үеийн Өмнөд Солонгосын шүүх үүнийг харгалзаагүй, буруу шүүсэн гэж үзэж байгаа аж. Тэрээр энэ лхагва гарагт өмгөөлөгч нарын хамт Пусаны дүүргийн шүүхэд давж заалдах өргөдлөө өгөх гэнэ.

1964 оны тавдугаар сарын 4-ний өдөр 18 настай байсан Чой Мал Жа өөрийг нь гудамжинд хүчирхийлэх гэж оролдсон Ро овогтой 21 настай эрэгтэйг гэмтээсэн хэргээр баривчлагдаж байжээ. Дараа жил нь тэрээр тэнсэн ял сонссон байна.

Мөрдөн байцаалтын явцад Чой өөрийгөө ямар ч буруугүй, хэлээ ам руу нь хүчлэн хийсэн эрэгтэйгээс өөрийгөө хамгаалахын тулд үйлдсэн хэрэг гэж мэдүүлжээ. Гэвч прокурорууд түүний мэдүүлгийг үл тоогоод зогсолгүй эрэгтэйг хүчингийн биш айлган сүрдүүлсэн хэргээр яллажээ. Мөн шүүхийн явцад Чой Мал Жаг "Та түүнд сэтгэлтэй байсан уу? Түүнтэй гэрлэх талаар бодож үзэх үү?" зэрэг ёс бус асуултуудад хариулахыг шаардсан байна.

Шүүхийн захирамж гарахаас өмнө Чой зургаан сар хоригдсон бөгөөд түүний аав охиндоо арай хөнгөн шийтгэл хүлээлгэхийн тулд Ро гэгчид тохиролцооны нөхөн төлбөр ч төлж байжээ.

Өнгөрсөн жилүүдийн #MeToo болон эмэгтэйчүүдийн бэлгийн дарамт, хүчирхийллийн эсрэг дэлхий даяарх хөдөлгөөнүүд Чойг хожимдсон ч гэсэн шударга ёсыг хайхад хүргэсэн гэлээ.

Эх сурвалж: The Korea Times

---