Тайланд улсын Нахон Ратчасима хотод орон нутгийн цагаар бямба гарагт зэвсэгтэй цэрэг худалдааны төвд халдлага үйлдэн, 21 хүн руу буудаж амь насыг нь хороож, 42 иргэнийг шархдуулсан байна. Сэжигтэн Жакрапант Томма нь цэргийн хуаранд бямба гарагийн 15:30 минутын орчимд удирдах албан тушаалын офицерынхоо амийг бүрэлгэж зэвсгийг нь хулгайлан зугтжээ.

Аюулгүйн хүчнийхэн худалдааны төвд ирж олон зуун иргэнийг аварсны дараа сэжигтэй гэмт этгээдийг буудаж хороосон байна.

Терминал 21 буюу Корат нэртэй худалдааны төвд оройн 18 цагийн үед болсон халдлагын улмаас аюулгүйн хүчний нэг ажилтан амиа алджээ. Ням гарагийн байдлаар дэлгүүрийг бүсэлсэн хэвээр байсан юм.

Албан бус мэдээгээр 32 настай сэжигтэн дэлгүүрийн арын хаалгаар зугтахыг оролдсон бөгөөд иргэдийг барьцаалсан тухай мэдээлсэн байна. Мөн сэжигтний ээжийг хэргийн газарт авчирж түүнийг бууж өгөхийг ятгуулжээ.

Халдлага үйлдэж байхдаа сэжигтэн өөрийн Facebook хуудсандаа бууж өгөх эсэхдээ эргэлзэж буйгаа илэрхийлэн пост оруулсан байна. Өмнө нь гар бууны зураг оруулан “хөгжилдөх цаг эхэллээ, хэн ч үхлээс зугтаж чадахгүй” гэсэн байжээ.

Эх сурвалж: BBC

---