Коронавирусээр халдварлаад эдгэсэн Их Британийн Ерөнхий сайд Борис Жонсоны сүйт бүсгүй Кэрри Саймонд амаржиж тэд хүүтэй болсон тухай баярт мэдээг дуулгажээ. Ерөнхий сайдын хэвлэлийн төлөөлөгч ээж болон хүүгийн биеийн байдал сайн байгаа гэдгийг мэдээлсэн байна.

Хэдийгээр Жонсон шинэхэн хүүхдээ өлгийдөж авсан ч улс орон даяар коронавируст цар тахалтай тэмцэж байгаа тул Даунинг Стрийтэд ажилласан хэвээр байгаа юм. Шинэ хүнтэй болсны богино хугацааны амралтаа энэ жилийн сүүлээр авахаар төлөвлөсөн ажээ.

Дэлхийн удирдагчид, улс төрийн зүтгэлтнүүд халдварт тахалтай тэмцэж эдгээд удаагүй байгаа Жонсонд баяр хүргэцгээсэн байна. Австрали болон Японы Ерөнхий сайдууд хамгийн түрүүнд баяр хүргэжээ. Даунинг Стрийт нярай хугацаанаасаа өмнө төрсөн эсэх, жин, цаг, хаана төрсөн зэргийг нууцалжээ.

Их Британийн хатан хаан Элизабет хосод баяр хүргэж хувийн зурвас илгээсэн талаар Букинхэмийн ордноос мэдээлэв. Хатан хаан Ерөнхий сайдтай хийдэг долоо хоног бүрийн уулзалтаа утсаар явуулахаар төлөвлөөд байна.

Энэ жил 55 настай Ерөнхий сайд болон түүний 32 настай сүйт бүсгүй Саймондс нар өнгөрсөн гуравдугаар сард хүүхэдтэй болох гэж байгаа гэдгээ олон нийтэд албан ёсоор мэдэгдэж байжээ. Өнгөрсөн жилийн сүүлээр сүй тавьж, энэ зуны эхээр амаржина хэмээн мэдэгдсэн юм. Хэдийгээр тэд сүй тавьсан ч гэрлэлгүй Даунинг Стрийт рүү хамт нүүсэн анхны хос болсон байна.

Шинээр мэндэлсэн хүү хатагтай Саймондсын анхны хүүхэд бол Ерөнхий сайд хэдий нь таван хүүхдийн эцэг болсон юм.

Эх сурвалж: ВВС

---