Испанийн зүүн хойд нутаг Лос Пажариллосын оршин суугч Даниель Жименезийг бүсгүй хүний чарлах дуунаар сэрэхэд шөнийн 02 цаг 30 минут болж байв. Цонхоор хартал гурван давхраас нэгэн эмэгтэй дүүжлэгдэж байлаа. Хөрш нь эмэгтэйг доош унавал амийг нь аврахаар орны зөөлөвчтэй гудсаа чирж гарсан ч харамсалтай нь хожимдож бүсгүй нас баржээ.

56 настай уг эмэгтэй гуравдугаар сарын 14-ний өдөр бүх нийтийн хорио цээр тогтоосноос хойш гэр бүлийн хүчирхийлэлд өртөж, бусдын гарт амиа алдсан гурав дахь эмэгтэй юм. 2020 он гарснаас хойш Испанид найз залуу болон хамтрагчдынхаа гарт 19 эмэгтэй алагджээ. 2003 оноос хойш хийсэн судалгаагаар нийт 1,051 эмэгтэй золгүй гэмт хэргийн золиос болсон байна. Өнгөрөгч 2019 онд ийм хэргээр 55 эмэгтэй амиа алджээ.

Коронавирусийн халдвараас үүдэж хорио цээрийн дэглэм тогтоосноор ижил төрлийн гэмт хэрэг улам ихэснэ хэмээн мэргэжилтнүүд эмээж байна. Иргэд хүнс, эм худалдаж авахаас бусдаар гэрээсээ гарах эрхгүй болсон нь хүчирхийлэгч хамтрагчтай амьдардаг эмэгтэйчүүдэд тэднээс зугтах боломжийг бууруулсан хэмээн тайлбарлажээ.

Энэ сарын эхний хоёр долоо хоногийн хугацаанд Испанид гэр бүлийн хүчирхийлэл 47 хувиар өссөн гэж үзжээ. Цахим шуудан, цахим сүлжээ зэргээр эмэгтэйчүүд тусламж хүсэх нь 700 хувиар өссөн гэж Засгийн газраас мэдээлсэн байна. Гэвч цагдаагийн газарт биечлэн ирж гомдол гаргах явдал эсрэгээрээ эрс буурчээ.

Эх сурвалж: The Guardian

---