ОХУ-ын нийслэлд сүүлийн 24 цагийн дотор 67 хүн коронавирусийн улмаас нас барж, хотын нийт нас баралтын тоо 546-д хүрлээ. Энэ нь Москвад халдварын улмаас нэг өдөрт хамгийн олон хүн нас барсан үзүүлэлт болоод байна.

Тус хотод коронавирусийн тахал анх бүртгэгдсэнээс хойш 48,426 хүн өвчилж, 4130 хүн эдгэрээд байгаа юм.

Москва хот халдвар, нас баралтын тоогоор бүс нутгуудын дунд тэргүүлэгч хэвээр байна. ОХУ-ын нийт халдвар болон нас баралтын талаас илүү хувь нь нийслэл хотод гарж байгаа аж.

Москва хотын захирагчийн орлогч Анастасия Ракова өнгөрсөн долоо хоногт уушгины хатгалгаагаар эмнэлэгт хэвтсэн өвчтөнүүдийн тоо 70 хувиар нэмэгдсэн тухай даваа гарагт мэдээлжээ.

Иймээс ойрын өдрүүдэд эрх баригчид коронавирусээр халдварласан өвчтөнүүдийг хүлээн авах эмнэлгийн орны багтаамжийг одоогийн 20 000-аас 27-28 000 болгож өргөжүүлэхээр төлөвлөж байна. Түүнчлэн нийслэл хотын хөл хориог тавдугаар сарын 11-н хүртэл сунгажээ.

Эх сурвалж: rbc.ru

---