Алдарт хөлбөмбөгчин Дэвид Бекхэмийн эхнэр Викториа Бекхэмийн хувцас загварын брэндийг хуучин ажилтан нь шүүхэд өгчээ. Тус брэндийн оёдлын хэлтсийн ажилтан өдөрт 15 цаг тасралтгүй ажилласнаас болж гараа гэмтээн, яаралтай мэс засалд орох шаардлагатай болсон байна.

Нью-Йоркийн загварын долоо хоногийн бэлтгэл ажлын хүрээнд 54 настай Кристина Кубилень гэгч эмэгтэй ачаалал ихтэй ажиллажээ. Найман жил Лондон дахь Викториа Бекхэмийн загварын студид ажилласан эмэгтэй бугуйны үений хам шинжээр өвдөж  цүнхээ ч онгойлгож чадахгүй болсон тул өнгөрсөн жил ажлаасаа гарчээ.

Ажлаасаа гарч хагалгаанд орсон ч дахин ажил хийх чадвараа алдсан байна. Кубилень долоо хоногийн турш амралтгүй ажилласнаас болж гар хуруу нь өвдөж, мэдээ алдах болсон бөгөөд өвчин намдаагч эм их хэмжээтэй хэрэглэдэг байжээ. Гэвч Бекхэмийн гэр бүлийн компани түүнийг асран халамжлах, санаа тавихаас татгалзсан учир шүүхэд хандаж байгаа гэж өмгөөлөгчид нь мэдэгджээ.

Викториа Бекхэмийн компаниас тодруулга авахыг хүссэн ч хариу өгөөгүй байна. Энэ сар Бекхэмийн компани коронавирусийн хорио цээрийн үед 30 ажилтандаа чөлөө олгохын тулд татвар төлөгчдийн мөнгийг хэрэглэсэн нь ихээхэн эсэргүүцэлтэй тулгараад байгаа юм.

Эх сурвалж: The Guardian

---