Монгол Улсын хувьд шинэ коронавирусийн халдварын анхны тохиолдол болсон Францын иргэнд анхны бас сүүлийн тохиолдол байгаасай хэмээж "Анх-Отгон" гэх нэр өгсөн.

Тус иргэнд хийж байсан таван төрлийн дээж бүхий шинжилгээний нэгээс нь коронавирус илэрсээр байсныг ХӨСҮТ-ийн захирал Д.Нямхүү эмч өчигдөр мэдээлж байсан бол өнөөдөр ийнхүү бүх хариу нь сөрөг гарсныг мэдэгдлээ. 

Эрүүл мэндийн яамны өнөөдрийн мэдээллийн үеэр ХӨСҮТ-ийн захирал Д.Нямхүү "Сайхан мэдээ дуулгахад Франц иргэний бүх шинжилгээ эрүүл гарч өнөөдөр дараагийн шатны хяналтад шилжих гэж байна. Тэрбээр 47 хоног эмчлүүлсэн, Энхсаран сувилалд тусгаарлагдана" гэв.

Тэрбээр "Франц иргэн өвдсөн цагаас эхлэн дэлхий биднийг харж эхэлсэн. Франц улс ч иргэнд маань хэрхэн хандах бол гэж харж байсан. Бид эмчлээд гаргалаа. Сайхан жишиг бий болголоо. Дэлхийн хаана ч Монгол Улсын иргэн өвдөж болно. Тиймээс бусад улс орнууд манай иргэдэд ч ингэж хандаасай гэж хүсч байна” хэмээсэн юм.

Тэгвэл энэ сайн мэдээг дуулгасан өдөр буюу дөрөвдүгээр сарын 27-н нь Монгол-Францын дипломат харилцаа тогтоосон ойн өдөр аж. Өнөөдөр хоёр улсын хооронд дипломат харилцаа тогтоосны 55 жилийн ой тохиож байна.

---