Итали улс коронавирусийн халдварын тохиолдлоор Европ тивд тэргүүлж 200,000 дөхөж, 26,000 гаруй иргэн нас бараад байна. Тус улсын эрх баригчид долоон долоо хоногийн турш үргэлжилсэн хорио цээрийн дэглэмийг цуцлахаар төлөвлөжээ.

Гуравдугаар сарын дундаас хойш Итали улсад коронавирусээр нас барсан тохиолдол хамгийн бага гарсан байна. Ерөнхий сайд Жузеппе Конте ирэх тавдугаар сарын 4-ний өдрөөс хойш хорио цээрийг суллаж магадгүй хэмээн мэдэгджээ. Ирэх сараас эхлэн иргэд гадагш гарч, төрөл төрөгсөд дээрээ зочлох боложтой болох ба ингэхдээ амны хаалт заавал зүүх ёстой гэсэн дүрмийг баримтлах ажээ.

Цэцэрлэгт хүрээлэнгүүд үйл ажиллагаагаа нээх ч сургууль, цэцэрлэгүүдийг ирэх есдүгээр сар хүртэл ажиллуулахгүй. Мөн оршуулгын үйл ажиллагааг сэргээж дээд тал нь 15 хүн цуглахыг зөвшөөрчээ. Баар, зоогийн газрууд үйл ажиллагаагаа эхлүүлж болох ч хоол хүнсийг зөвхөн хүргэлтээр хүлээн авах боломжтой.

Харин үсчин, гоо сайхны салонууд ирэх зургадугаар сарын 1-ний өдрөөс үүд хаалгаа нээнэ. Музей, номын сангуудын үйл ажиллагаа, спортын тамирчид багаараа бэлтгэл хийх зөвшөөрлийг тавдугаар сарын 18-ны өдрөөс олгох юм байна.

Хоногт 260 хүн нас барсан нь Итали улсад хамгийн бага тохиолдол болсон бөгөөд коронавирусийн халдварын оргил үе өнгөрсөн гэж үзэж байна.

Эх сурвалж: ВВС

---