БНСУ-ын Пусан хотын дарга У Го Дун төрийн албан хаагчид бэлгийн дарамт үзүүлснээ хүлээн зөвшөөрч, албан тушаалаасаа огцорлоо.

Тэрээр өчигдөр хийсэн хэвлэлийн бага хурлын үеэр “Би төрийн албан хаагчтай хийсэн уулзалтын үеэр түүний биед зохисгүйгээр хүрсэн. Энэ бол ёс журамгүй хүчирхийлэл гэдгийг би ойлгосон. Толгойгоо бөхийлгөн, өөрийн үйлдэлдээ уучлалт гуйж байна” гэжээ.

2018 онд хотын даргаар сонгогдсон У Го Дун 2022 он хүртэл албан тушаалдаа суух төлөвтэй байсан тул энэхүү мэдээ нь иргэдэд гэнэтийн мэдээ байлаа.

Тэрээр дөрөвдүгээр сарын 14-нөөс хойш чөлөө аван, олон нийтийн үйл ажиллагаанд оролцохгүй байсан юм. Хүмүүс түүнийг эрүүл мэндийн асуудалтай байгаа гэж таамаглаж байсан ч огцрох болсон шалтгаан нь бэлгийн дарамт гэдэг нь илэрчээ.

Эх сурвалжийн мэдээлснээр хохирогч болон түүний гэр бүлийнхэн түүнийг огцрохыг хүчтэй шаардсан аж. Бүрэн хариуцлага хүлээнэ гэдгээ илэрхийлсэн У Го Дун иргэд болон хэвлэл мэдээллийнхнээс хохирогчийг хамгаалахыг хүсжээ. Тэрээр “Би уучилж боломгүй алдаа хийсэн гэдгээ мэдэж байна. Пусаны иргэдийн надад өгсөн хотын даргын байр суурьт суух эрхгүй боллоо” хэмээн нэмэн хэлжээ.

У Го Дун мөн Өмнөд Солонгосын эрх баригч Ардчилсан намын гишүүн юм. Түүнийг намаас хөөх эсэхийг шийдэхээр Ардчилсан намын ёс зүйн комисс өнөөдөр хуралдана гэнэ.

Эх сурвалж: The Korea Times

---