Мексикийн Гуадалахара хотын чих хамар хоолойн эмч Жованна өглөөний зөвлөгөөнөө тараад харьж байжээ. Ард нь хэн нэгэн хүн орилох чимээнээр эргээд хартал хэдхэн секундын дотор нүүр нь чийгтэв. Удалгүй хлор үнэртэж, нүүрнийхээ арьсыг түлэгдсэн гэдгийг мэдэрсэн байна. Энэ өдөр дахин нэг эмч ижил төрлийн халдлагад өртжээ.

Дэлхийн ихэнх улс оронд эрүүл мэндийн салбарын ажилтнуудыг коронавирусийн эсрэг тэмцэлд галын шугаманд тэмцэж буйд бахархан баяр хүргэж, баатрууд хэмээн хүндэлж байхад Мексик улсад эсрэгээрээ ажээ. Мексикт коронавирусийн халдварын тохиолдол нэмэгдэх тусам эмнэлгийн ажилтнуудыг хариуцлагагүй хандаж, цар тахлыг тараалаа хэмээн буруутгаж үзэн ядах, биед нь халдах үзэгдэл нэмэгдсээр байна.

Тус улсад коронавирусийн 11,000 гаруй тохиолдол бүртгэгдэж, мянга гаруй иргэн нас баржээ.

Эх сурвалжийн дурдсанаар улсын 12 мужид эмнэлгийн 21 ажилтан халдлагад өртжээ. Эмч, сувилагч нар халдлагад өртөхөөс эмээж ажлаа тараад харих, хаа нэгтээ явахдаа халаад, дүрэмт хувцасаа сольж явах болжээ.

Мексикийн нийгмийн аюулгүй байдлыг хамгаалах хүрээлэнгийн сувилахуйн албаны дарга Фабиана Зепеда  27 жилийн турш бахархалтайгаар өмсөж байсан халаадаа гэмтэж бэртэхгүйн тулд тайлах болсондоо сэтгэл дундуур байгаагаа илэрхийлжээ. Эмнэлгийн ажилтнуудад халдаад зогсохгүй зоогийн газар, супермаркет тэдэнд үйлчлэхээс татгалзаж, автобус метроноос хөөж буулгах явдал гарсаар байна.

Коронавирусийн тархалт хурдацтайгаар нэмэгдэж байгаад Ерөнхийлөгч Андрес Мануэль Лопез Обрадорыг түргэн шуурхай арга хэмжээ авч, урьдчилан сэргийлэхийн тулд нийтээс зай барих дүрэм хэрэгжүүлээгүй хэмээн буруутгаж байна. Эмч мэргэжилтнүүд ачаалалтай ажиллаж байгаа ч хамгаалалтын хувцас хэрэглэл, хүн хүч дутмаг байгааг эсэргүүцэж ажил хаялт зарлан, жагсаал хийжээ.

Эх сурвалж: The Guardian

---