Хүүхэд залуучууд тоглож, хөгшид нарлаж сууж ёстой нийтийн эзэмшил талбай дээр зөвшөөрөлгүй тоосгон гарааш барьж, хайс хашаагаар тойруулан хашсанаас хойш долоон жил өнгөрчээ

Өнөөдөр Сүхбаатар дүүргийн Газар зохион байгуулалтын алба тус дүүргийн 7 хороо, Денверийн гудамж дахь орон сууцны хороололын өмнө орших блокон хашаа болон бетоноор хучсан тоосгон гараж, төмөр хайсан хашааг буулгаж газрыг нь чөлөөллөө.

Сүхбаатар дүүргийн 7 хороо арван мянга гаруй хүн амтай. Гурван мянга гаруй бага насны хүүхдүүд амьдардаг. Газар чөлөөлөлт хийгдсэнээр, нийтийн эзэмжшил газрыг засч тохижуулан, мод тарьж зүлэгжүүлж, ногоон байгууламж бүхий хүүхдийн тоглоомын талбай, сүүдрэвч, дугуйн замтай, тохь тухтай орчныг бий болгоно гэлээ.

 

Сүхбаатар дүүргийн 7 хорооны засаг дарга Л.Отгонцэцэг "Оршин суугчдын зүгээс нийтийн эзэмшил талбайд зөвшөөрөлгүй баригдсан тоосгон гарааш, бетонон хашааг нураахыг олон жил шаардаж ирсэн. Манай хороо барилгажилт ихтэй, газар багатай. Гэтэл жаахан байсан газрыг дураараа өмчилж, хашаа барьсан байсан. Өнөөдөр нийтийн эзэмшилд шилжиж байгаад маш их баяртай байна. Ер нь хаана л хашаа хайс булан тохой байна, тэнд архидан согтуурах, ил задгай хогоо хаях, орчныг бохирдуулах гэх мэт гэмт хэрэг гарах нөхцөл бүрддэг байсан" гэлээ.

Сүхбаатар дүүргийн 7 хорооны СӨХ-ны дарга З.Одонгуа "Газар чөлөөлөлт хийгдэж нийтийн эзэмшлийн талбай оршин суугчдын мэдэлд ирж байгаад талархаж байна. Одоо энд гэрэлтүүлэг хийгдэнэ. Хүүхдүүд тоглох тоглоомын талбайтай болно.Гэрэл гэгээтэй орчинд амьдрах боломжийг  олгож байгаа нийслэлийн газрын алба, дүүргийн газрын албаны албан хаагчдад баярлаж байна" гэлээ.

Сүхбаатар дүүргийн Газар зохион байгуулалтын албаны мэргэжилтэн Н.Бямбадорж "Газрын зөрчил арилгах, орчны аюулгүй байдлыг хангах,  дугуйн трассыг чөлөөлөхөөр нийслэлийн засаг даргын 513 тоот захирамжийн дагуу газар чөлөөлөлтийн ажлууд хийгдэж байна. Сүхбаатар дүүргийн тухайд 18 байршлын 32 объектийн газрын зөрчлийг арилгаж, газрыг чөлөөлнө" гэсэн юм.   

---