Иран улсын хувьсгалт гвардын корпус түүхэндээ анх удаа цэргийн зориулалттай хиймэл дагуулыг сансарт амжилттай хөөргөсөн тухай мэдээлжээ. Нур буюу гэрэл гэсэн нэртэй хиймэл дагуулыг Касед пуужингаар хөөргөсөн байна.

АНУ-ын төрийн нарийн бичгийн дарга Майк Помпео Ираны энэ үйлдлийг НҮБ-ын тогтоолыг зөрчсөн тул хариуцлага тооцох ёстой гэж мэдэгджээ. Тэрээр хэрэв далай тэнгист байгаа Америкийн далбаатай усан онгоцууд халдлагад өртвөл Ираны талын цэрэг зэвсгийг устгах болно хэмээн нэмж анхааруулсан байна.

Хувьсгалт гвардын мэдээлснээр хиймэл дагуулыг лхагва гарагт алслагдсан цөлийн бүсээс хөөргөжээ. Гвардын хошууч генерал Хуссейн Саламийн хэлснээр цэргийн хиймэл дагуул амжилттай хөөргөж дэлхийн тойрог замд оруулснаар стратегийн ач холбогдолтой мэдээ мэдээлэлд илүү ойр болж байна.  

Өнгөрсөн хоёрдугаар сард Иран улс холбоо харилцааны зориулалтаар Зафар хиймэл дагуул хөөргөхийг оролдсон ч бүтэлгүйтсэн юм. Мөн өнгөрсөн жил хоёр ч хиймэл дагуул хөөргөсөн нь амжилттай болоогүй ажээ.

Эх сурвалж: ВВС

---