Унгараас ачаа тээвэр хийн, ОХУ-ын нутаг дэвсгэрээр хөндлөн гулд явж, Алтанбулаг боомтоор орж ирсэн жолооч болон түүний эхнэрээс халдвар илэрснийг ЭМЯ албан ёсоор зарлалаа. 

Олон улсын тээврийн жолоочоос халдвар илэрсэнтэй холбогдуулж, өчигдөр УОК, НОК хуралдан нийслэл болон Дархан, Сэлэнгэ аймгаас орох, гарах хөдөлгөөнийг дөрөвдүгээр сарын 25-ны 06 цаг хүртэл хорьсон. Өнөөдөр өглөө энэхүү арга хэмжээг нарийсган, бүх аймгийн орох, гарах хөдөлгөөнийг дээр дурдсан хугацаанд хаасан болохыг ТЦА-наас мэдээллээ. 

УОК болон НОК юуны учир ингэж хөл хөдөлгөөнийг хорьсон учир өнөөдрийн ЭМЯ-ны хэвлэлийн хурлаар үндсэндээ тодорхой боллоо. ХӨСҮТ-ийн захирал Д.Нямхүү "Жолоочийн ойрын хавьтлын 42 хүнийг тусгаарлаж шинжилгээнд хамруулсан. Хяналт тавьсан хилийн байцаагч, гаалийн байцаагч, ачаа тээвэр буулгасан хүмүүс бүгд хамгаалалтын хувцастай үйлчилсэн. 42 хүний зарим нь Дархан-Уул, Сэлэнгэ аймагт байгаа бол зарим нь Замын-Үүдэд байна" хэмээн мэдээлсэн юм. 

Одоогоор жолоочийн ойрын хавьтлын 42 хүнээс халдвар илэрсэн эсэх нь тодорхойгүй байгаа ч зарим нь Замын-Үүд хүртэл зорчсон, зорчихдоо Улаанбаатар хотоор дайрсан байх магадлалтай гэж үзсэн учир ийн төв суурин газруудын хөл хөдөлгөөнийг тодорхой хугацаанд хаах шийдвэр гарчээ. Иймд өчигдөр НОК-ын хэвлэлийн хурал дээр хотын орлогч Ж.Батбаясгалан "Онцын шаардлагагүй бол 25-ныг дуустал гэрээсээ бүү гараарай" гэж мэдэгдсэн нь ийм учиртай ажээ. 

---