ХӨСҮТ-ийн Тандалт судалгааны албаны дарга А.Амбасэлмаа өнөөдөр тус төвийн хоёр лабораторид COVID-19 халдвар илрүүлэх шинжилгээний хариуг танилцууллаа. Сүүлийн 24 цагт 80, зарим үед 500 гаруй шинжилгээ хийж байгаа гэв.

"Интермед" эмнэлэгт хэвтсэн иргэний шинжилгээний хариу сөрөг гарсан бол өөр нэг хүний шинжилгээгээр коронавирус илэрлээ.

Энэ сарын 18-нд Алтанбулаг хилийн боомтоор Монгол Улсад ирсэн олон улсын ачаа тээврийн /TIR/ автомашины жолоочоос коронавирус илэрч, Монгол Улсад халдварын батлагдсан тохиолдол 34 боллоо.

Уг иргэн эхнэртэйгээ хамт тээвэрт явсан бөгөөд ирсэн даруйд нь тусгаарласан байсан. Халдвар авсан хүний эхнэр болон өөрт нь халдварын шинж тэмдэг одоогоор илрээгүй байна. Нэг, нэгээр нь зочид буудалд тусгаарлагдсан байсан тул бусдад тараах эрсдэл үүсээгүй гэв.

Энэ хүн хоёрдугаар сарын 21-нд ОХУ-аар дамжин Унгарын Будапешт яваад энэ сарын 18-нд иржээ. Өнөөдрийн байдлаар олон улсын тээврийн 79 жолоочийг тусгаарлаад байна.

Олон улсын тээврийн /TIR/ машины жолооч нар удаа хугацаагаар явдаг учир гэр бүлийнхэн нь уулзах, хоол хувцас авчрах зэргээр уулзах хүсэлтэй албаны хүмүүст илэрхийлжээ. Тэдний хүсэлтэд "Тэгэх шаардлагагүй, халдвар хамгааллын дэглэмийг сахихыг иргэддээ анхааруулмаар байна" хэмээсэн байна. 

"Жолооч нар бүгд тусгаарлах хувцастай явдаг. Жолооч нарыг зочид буудалд ганц ганцаар нь тусгаарласан байсан гэдгийг дахин сануулмаар байна. Манай улсад коронавирусийн халдвар тусгай үүргийн онгоцоор ирсэн, ОХУ-аас дамжин ирсэн болон тээврийн жолооч нараас илэрч байгаа тул сонор сэрэмжтэй байхыг дахин анхааруулж байна" гэж ХӨСҮТ-ийн Тандалт судалгааны албаны дарга А.Амбасэлмаа мэдээлэв.

---