Улаанбаатар-Дархан-Уул чиглэлийн авто замыг дөрвөн эгнээ, хоёр урсгалтай, хатуу хучилттай зам болгох шийдвэрийг Засгийн газар 2018 онд гаргасан.

Үүний хүрээнд ЗТХЯ-наас тус чиглэлээр үйл ажиллагаа явуулдаг таван гүйцэтгэгч компанийг шалгаруулж, ажлыг эхлүүлэхээр хуучин замыг хуулаад орхисон. Гэвч тэдгээр компанийн хоёр нь албан үүргээ цалгардуулснаас өдгөө олон иргэд эрүүл мэнд, эд хөрөнгөөрөө нэг бус удаа хохироод байгаа юм.

Иймд “Хэвтүүл хөдөлгөөн”-ний тэргүүн А.Цэрэнбат тухайн замд хохирсон тээврийн жолооч болон ард иргэдийн төлөөлөл болон ЗТХЯ-ийг шүүх хяналтын байгууллагад шилжүүлж, хариуцлага хүлээлгэнэ хэмээн өнгөрсөн хоёрдугаар сард мэдэгдэж байсан. Тэгвэл өнөөдөр эхнээсээ шүүхэд хандаад эхэлсэн талаараа мэдээлэл өглөө. 

Өнгөрсөн долдугаар сараас хойш Дарханы замд 140 зам тээврийн осол бүртгэгдэж, 20 гаруй иргэн амь насаа алдсан. Уг замаар зорчиж эд хөрөнгө, эрүүл мэндээрээ хохирсон 300 иргэн өнгөрсөн хугацаанд бүртгүүлж, 200 сая төгрөгөөр хохирсон талаараа гомдол гарган эхний ээлжинд дөрвөн сая төгрөгөөр хохирсон нэг иргэн Сүхбаатар дүүргийн иргэний хэргийн шүүхэд хандаад байна. Зам тээврийн сайд Б.Энх-Амгалан болон Зам тээврийн яамыг хариуцагчаар татсан.

А.Цэрэнбат “Дарханы замд хохирсон иргэд нийлэн Зам тээврийн сайд Б.Энх-Амгаланд хариуцлага тооц хэмээн Засгийн газарт хүсэлт гаргасан. Уг хүсэлтийн хариуд “Хэрвээ та бүхний эрх ашиг зөрчигдсөн гэж үзэж байвал шүүхэд эрхээ хамгаалуулахаар хандаж болно” гэсэн. Бид нарын зүгээс Дарханы замын бүтээн байгуулалтын ажлыг хурдан хийгээч хэмээн хүсэж байгаа.

Тээврийн цагдаагийн газарт Дарханы замд гарч байгаа зам тээврийн ослыг бууруулахын тулд ямар ажил хийж байгаа талаар хүсэлт явуулсан. “Аюулгүй байдлыг хангуулахаар ажиллаж байгаа боловч авто замын эвдрэл, үзэгдэх орчин, тоосжилт, хөдөлгөөн зохицуулах мэдээллэх самбар зэргийг гүйцэт байршуулаагүй зэргээс тээврийн хэрэгсэл аюулгүй зорчих боломж бүрдэхгүй байна” хэмээн цагдаагийн байгууллага нь нотолчоод байна.

Мэргэжлийн бус хүн Зам тээврийн салбарыг толгойлсноос хойш худлаа ярьж, төсөв гарган зам засаж байгаа хэмээн хэлдэг ч хачир дээрээ төсөв авсан гээд байгаа компаниуд нь одоо хүртэл зам арчилгааны хөрөнгө мөнгө аваагүй гэх тайлбарыг өгч байна.

Иймээс Зам тээврийн сайд Б.Энх-Амгаланг цагдаа болон АТГ-т өргөдөл гаргаж, шалгуулна хэмээн мэдэгдлээ. 

---