Бразил улсын Ерөнхийлөгч Жайр Болзонаро коронавируст цар тахлын тархалтыг зогсоохоор тогтоосон хорио цээрийг эсэргүүцсэн иргэдтэй хамт жагсаалд нэгдсэн нь багагүй шүүмжлэл дагуулж байна. Төрийн тэргүүн хөл хорио тогтоосон мужийн захирагч нартай хэдэн долоо хоногийн турш санал зөрөлдөж, хатуу чанга хорио цээрийн дэглэм нь дарангуйлал хэмээн буруутгасаар байгаа юм.

Тус улсад коронавирусийн халдварын 40,000 гаруй тохиолдол бүртгэгдэж, 2,500 гаруй иргэн нас барсан. Энэ тоогоороо Бразил улс дэлхийд 11 дүгээрт, Латин Америкт тэргүүн байранд бичигдэж байна.

Өнгөрсөн ням гарагт Болзонаро нийслэл Бразилиа хот дахь армийн удирдах байрны гадаа хэдэн зуун дэмжигчдийн хамт жагсаал хийж нэгджээ. Түүний хэлснээр хувийн эрх чөлөөгөө хамгаалж буй жагсагчид бол баатрууд юм. Мөн хорио цээрийн дэглэмийг дуусгахыг шаардаж, гарын үсэг цуглуулахаа мэдэгджээ. Тэрээр жагсаалд оролцохдоо амны хаалт зүүгээгүйн дээр, ханиалгаж байсан нь ихээхэн шүүмжлэл дагуулаад байна.

Ерөнхийлөгч Болзонаро Ковид-19 коронавирусийг ханиаднаас жаахан л хүнд халдварт өвчин хэмээн мэдэгдэж, хорио цээрийн дэглэм тогтоох нь зүйтэй гэж үзсэн Эрүүл мэндийн сайдаа өнгөрсөн долоо хоногт халжээ. Чанга хатуу дэглэм нь иргэдийн эрх чөлөөнд халдаад зогсохгүй эдийн засгийг сүйрүүлэх эрсдэлтэй тул хилээ ч бас нээх нь зүйтэй гэж тэрээр үзжээ.

Эх сурвалж: ВВС

---