Шударга өрсөлдөөн, хэрэглэгчийн төлөө газраас өнөөдөр шатахуун импортлогч компаниудад гэнэтийн хяналт шалгалт хийх талаар мэдээлэл хийлээ. 

Өнгөрөгч долоо хоногт шатахууны чанартай холбоотой олон тооны санал гомдол гарсан. Ялангуяа нэр бүхий компаниудаар үйлчлүүлэхэд шатахууны октан заасан хэмжээнд хүрэхгүй байна, чанаргүй шатахуун нь машин эвдэж байгаа тухай ярих болсон юм. Холбогдох байгууллагуудад санал, гомдол багагүй ирсэн байна. 

Үүнтэй холбогдуулж, ШӨХТГ, Мэргэжлийн хяналтын ерөнхий газар, Ашигт малтмал газрын тосны газар, Стандартчилал хэмжилзүйн газраас ажлын хэсэг гарч хяналт шалгалтын ажлыг эхлүүлэх гэж байгаа юм байна.

Хачирхалтай нь, үүнийгээ "гэнэтийн хяналт шалгалт" гэж ШӨХТГ-ын дарга Б.Лхагва нэрлэсэн ба хэвлэлийн бага хурал хийн, орон даяар зарлахаар шалгалтын дүн нь бодит гарах эсэх дээр олон түмэн эргэлзэж байгааг мэдэрч байгаа болов уу? Гэнэтийн бус шалгалтыг аргалж гарах түмэн аргыг компаниуд энэ олон жилд боловсруулалгүй хаачих билээ дээ. Дарга нар ирэх сургаар шинэ халаатаа өмсөөд, ширээний бүтээлгээ солиод сууж байхгүй хаачих билээ дээ.

"Гэнэтийн шалгалтаар шатахуунаас нь дээж аван, төв лабораториор шинжлүүлж хариуг нь ирэх долоо хоногоос мэдээлнэ" гэж байх шиг. Ёстой л нүглийн нүдийг гурилаар хуурав гэгч болжээ. 

Тэмцэгч О.Магнайг энэ байгууллагыг удирдаж байх үед харин гэнэтийн шалгалт хийгдэж, шатахуун импортлогч компаниудад 17 тэрбум төгрөгийн торгууль тавигдаж байсан. Гэвч, түүнийг даргын суудлаас мулталсны дараа энэхүү хэрэг, хэрэг биш болсон болохоос хамгийн "гэнэтийн", бодитой болсон шалгалт энэ л байж.

Түүнээс хойш гэнэтийн нэрээр гэнэт бус хийдэг шалгалт төдий болж хувирч дээ. 

---