Энэтхэг улсад коронавирусийн халдварын 17,615 тохиолдол илэрч, 559 хүн нас бараад байна. Тус улсад бүх нийтийг коронавирусийн илрүүлэг, шинжилгээнд хамруулах үйл ажиллагааг өргөн хүрээнд зохион байгуулж эхэлсэн.

Хувийн лабораториудыг ч мөн дайчилж, иргэдээс шинжилгээ авахыг зааварлаад байгаа юм. Тэдгээр хувийн лабораториудын нэг нь Дайрокэйр юм. Дайрокэйр лаборатори Засгийн газрын заавар зөвлөгөөгөөр Ковид-19-ийн шинжилгээг иргэн бүрт үнэ төлбөргүй хийж гүйцэтгэх ёстой.

Гэвч төлбөрийн боломжтой баян чинээлэг хүмүүс болоод Засгийн газар ядуусын өмнөөс төлбөр төлөх ёстой хэмээн Дайрокэйр лабораторийн үүсгэн байгуулагч Арокиасвами Велумани мэдэгджээ. Энэтхэгт коронавирусийн нэг шинжилгээг 4,500 рупи буюу дунджаар 60 ам.доллараар хийж байгаа нь ядуусын хувьд хямд өртөг биш юм.

Дээд шатны шүүх уг шийдвэрийг гаргахдаа хувийн лабораториудад зардлыг  нь буцааж төлөх болон хэрхэн нөхөн төлбөр олгох эсэхийг тогтоогүй байна. Дөрөвдүгээр сарын 13-ны өдөр эрүүл мэндийн хувийн байгууллагууд 500 сая иргэнийг шинжилгээнд хамруулах ёстой болсон юм.

Улсын 1,3 тэрбум иргэний 400,000 орчим нь шинжилгээнд хамрагдсан гэж эх сурвалж мэдээлжээ. Гаднаас оруулж ирэх импортын оношлуур замдаа саатаж байгаа тул Энэтхэгийн эрүүл мэндийн судалгааны зөвлөл дотооддоо үйлдвэрлэсэн оношлууруудыг ашиглаж байна.

Эх сурвалж: ВВС

---