Канад улсын Нова Скотиа мужид цагдаагийн дүрэмт хувцас өмссөн буутай этгээд халдлага үйлдэж 16 хүний амь насыг хороожээ. Амиа алдсан хохирогчдын дунд цагдаагийн эмэгтэй албан хаагч багтжээ.

Халдлага үйлдсэн этгээдийг барихын тулд 12 цагийн турш хойноос нь мөшгиж, автомашинаар хөөж эцэст нь гэмт этгээд амиа алдсан байна. Уг халдлага орон нутгийн цагаар бямба гарагт алслагдсан хөдөө нутгийн Портапик тосгонд гарчээ. Цагдаагийн газрын өгсөн мэдээлэлд гэмт этгээд цагдаагийн хувцас өмсөөд зогсохгүй цагдаагийн машин жолоодож байсан тухай дурджээ.

Ням гарагийн байдлаар гэмт этгээд хэд хэдэн байрлалд иргэд рүү буудаж хороосон тул түүнд буудуулсан хохирогчдын тоо цаашид нэмэгдэж болзошгүй гэдгийг анхааруулсан байна. Халдлага гарсны дараа Портапик тосгоны оршин суугчдыг аюулгүй байдлаа хамгаалж гэрээсээ гарахгүй байхыг зөвлөжээ.

Канад улсын Ерөнхий сайд Жастин Трюдо гүн эмгэнэл илэрхийлж Нова Скотиа мужийн түүхэнд тохиосон хамгийн аймшигтай үйл явдлуудын нэг байлаа гэжээ.

Гэмт этгээдийг 51 настай Габриель Вортман гэгч болохыг мужийн цагдаагийн газар цахим хуудсандаа нийтэлжээ. Чухам яагаад аймшигт халдлага үйлдсэн нь тодорхойгүй ч санамсаргүй байдлаар эхний халдлага үйлдэгдсэн байж болзошгүй хэмээн таамаглаж байна. Мөн түүнийг цагдаагийн хүчинд алба хаадаггүй гэдгийг мэдэгджээ.

Тус улс нь хөрш АНУ-тай харьцуулахад галт зэвсэг эзэмших хууль хатуу чанга учир ийм төрлийн гэмт хэрэг маш бага гардаг. Өнгөрсөн жил өсвөр насны хоёр хүүхэд галт зэвсгээр гурван хүний аминд хүрсэн хэрэг гарсан юм.

Эх сурвалж: ВВС

---