Дэлхий даяар 135 орчим мянган хүний аминд хүрээд буй шинэ коронавирус тахлын гарал үүслийн талаар судалгаанд БНХАУ-ын засгийн газраас цензур тавьжээ.

Коронавирус анх гарсан Ухань хот дах Геологийн Их сургуулийн мэдэгдсэнээр одооноос эхлэн бүх судалгааг Шинжлэх ухаан, технологийн яаманд шалгуулан, зөвшөөрөл авсны дараа нийтлэх боломжтой аж.

Уг мэдэгдэлд "Шинэ коронавирусийн гарал үүслийн талаарх эрдэм шинжилгээний ажлууд хэвлэгдэхээс өмнө сургуулийн комиссоор хянагдах шаардлагатай. Үүнд судалгааны үнэн зөв байдал, түүнийг хэвлэхэд тохиромжтой эсэхэд анхаарах болно" гэжээ. Мөн "Хяналтын дараа Шинжлэх ухаан, технологийн яаманд тайлагнаж, зөвхөн яамнаас зөвшөөрөл олгосны дараа нийтлэх боломжтой" гэсэн байна.

Энэхүү шийдвэрээс өмнө Хятадын зарим албан тушаалтнууд коронавирус Ухань хотын далайн бүтээгдэхүүний захаас үүсэлтэй гэдгийг үгүйсгэж байсан. Өнгөрсөн гуравдугаар сард БНХАУ-ын Гадаад хэргийн яамны хэвлэлийн төлөөлөгч Жао Лижиан вирусийг АНУ-ын цэргүүд Хятад улс руу 2019 онд Ухань хотод болсон Дэлхийн цэргийн наадмын үеэр авчирсан гэсэн үндэслэлгүй онолыг гаргасан.

Нэрээ нууцалсан нэгэн хятад судлаач CNN-д өгсөн ярилцлагадаа “Энэ бүхэн халдварт өвчний талаарх ирээдүйн эрдэм шинжилгээний ажилд саад болох болно. Миний бодлоор энэ бол Хятадын засгийн газраас зохион байгуулалттай явуулж буй бодлого бөгөөд тэд коронавирусийн дэгдэлт Хятадаас эхлээгүй мэт байхыг хүсэж байгаа. Энэ өвчний гарал үүслийн талаар объектив судалгааг тэд үнэндээ хүсэхгүй байгаа гэж би бодож байна" гэжээ.

Эх сурвалж: The Korea Times

---