БНСУ-д Парламентын сонгуулийн санал хураалт өчигдөр болж өнгөрсөн билээ. Сонгуулийн санал хураалтын дүнг өнөөдөр танилцууллаа. Урьдчилсан байдлаар шинжээчид эрх баригч Ардчилсан нам коронавируст цар тахал, эдийн засгийн удаашрал, улс төрийн үймээнээс улбаалж олонхийн суудлаа алдана хэмээн таамаглаж байсан юм.

Тэгвэл Ерөнхийлөгч Мүн Жэ Иний эрх баригч нам эсрэгээрээ иргэдийн дэмжлэгийг авч ялалт байгууллаа. Ардчилсан нам Парламентын 300 суудлын 163-ыг нь эзэлжээ. Энэ нь Өмнөд Солонгосын ард түмэн коронавируст цар тахалтай тэмцэж буй Засгийн газрын үйл ажиллагааг дэмжиж байгаа гэдгийг харуулсан үйлдэл хэмээн судлаачид дүгнэж байна.

Өмнөд Солонгос улс дэлхийн хоёр сая гаруй иргэн коронавирусээр халдварлаж, хорио цээрийн дэглэм тогтоосон хүнд үед Парламентын сонгууль явуулсан анхны улс болов. Тус улсад өнгөрсөн 24 цагийн хугацаанд 22 хүн шинээр халдвар авч 10,613 болсон бол 4 хүн нэмж нас барснаар нийт эндэгдэл 229 боллоо.

Энэ жилийн сонгууль олон талаараа өмнөх жилүүдийнхээс онцгой болсны нэг нь Умард Солонгос улсаас урван тэрсэлж Өмнөд Солонгост ирсэн эрхэм Тэ Ён Хо нэр дэвшин ялалт байгуулсан явдал юм. Тэрээр Умард Солонгосоос Их Британид суух дэд элчин сайдаар томилогдон ажиллаж байгаад 2016 онд гэр бүлийн хамт зугтаж өмнөдөд ирсэн ажээ. Тэрээр эх орноосоо урвасан хамгийн өндөр албан тушаалтан гэдгээрээ олны анхаарлыг татаж байсан юм.

Тэ Ён Хо сөрөг хүчний Нэгдсэн Ирээдүй намаас нийслэл Сөүл хотын чинээлэг Ганнам дүүрэгт өрсөлдөн нэр дэвшжээ. Нийт 58,4 хувийн саналаар ялалт байгуулсныхаа дараа нулимсаа барьж дийлэлгүй баярлаж, талархсан сэтгэлээ илэрхийлсэн байна. Учир нь сонгуульд ялалт байгуулахынхаа өмнө түүний нэр дэвшсэн явдал нь Умард Солонгосын эрх баригчдад хэрэв тэд хатуу чанга дэглэмээ өөрчилж чадвал ирээдүйд юу болохыг харуулсан үлгэр жишээ байх болно хэмээн дэмжигчдийнхээ өмнө мэдэгджээ.

Тэрээр Өмнөд Солонгост урван ирсэн 33,000 хүний нэг бөгөөд өөрийн нэрийг Ку Мин буюу “хүмүүсийг аварья” гэсэн утгатай үгээр сольж, тайван амьдарч иржээ. Умард Солонгос улсаас жил бүр мянга орчим хүн Өмнөд Солонгост зугтаж ирдэг байна.

Хэдийгээр Ковид-19-ын тархалттай тэмцэж байгаа ч БНСУ-ын нийт иргэдийн 66,2 хувь нь санал хураалтад оролцсон нь тун өдөр үзүүлэлт юм.

Эх сурвалж: ВВС

---