Коронавирусийн хөл хориотой холбогдуулан цахим худалдаа, хэрэглээ хэрэглэгчдийн дунд ихэссэн нь Амазон сүлжээг үүсгэн байгуулагч Жефф Безост хөрөнгөө өсгөх боломжийг өгчээ. Амазоны хувьцааны ханш дээд цэгтээ хүрч, Безосын хөрөнгө 24 тэрбум ам.доллараар нэмэгдсэн байна.

Блүмберг сувгийн тэрбумтнуудын жагсаалтаас харахад дэлхийн хамгийн чинээлэг эрхэм Безосын нийт хөрөнгө 138 тэрбум ам.доллараар үнэлэгдэж байгаа ажээ. Түүнчлэн гэрээсээ гаралгүй цахимаар худалдан авалт хийж байгаа хүмүүсийн хэрэгцээ шаардлагыг гүйцэлдүүлэхийн тулд мянга мянган ажилтан шинээр авч ажиллуулж эхэлсэн байна.

Безосын 11 хувийг нь эзэмшдэг Амазоны хувьцаа мягмар гарагийн байдлаар 5,3 хувиар өсчээ.

Гэсэн ч АНУ дахь Амазон сүлжээний ажилтнууд ажлын байрны ариутгал, коронавирусийн эсрэг хамгаалалт хэт сул байгаад шүүмжлэлтэй хандаж байгаа юм.

Мөн Уол Март, Асда зэрэг сүлжээ дэлгүүрүүдийн орлого хорио цээрийн дэглэмийн үеэр нэмэгдсэн байна. Герман улсад үндэсний аюулгүй байдлын үүднээс хэрэглэхийг хориглоод байгаа Zoom видео сайтын үүсгэн байгуулагч Эрик Юанийн хөрөнгө хоёр дахин өсч 7,4 тэрбумд хүрчээ.

Харин онлайн бизнесээс бусад бизнес эрхлэгчид их хэмжээний алдагдал амсаж байгаа юм. Блүмбергийн тэрбумтнуудын жагсаалтад дэлхийн хамгийн баян 500 эрхэм энэ жил ашиг орлогоосоо 553 тэрбум ам.долларыг алдана хэмээн тооцоолжээ.  

Эх сурвалж: ВВС

---