60 тэрбумын хэргийг дэлгэсэн иргэн Г.Доржзодов өнөөдөр хэвлэлийн хурал хийлээ. Хэвлэлийн хурал хийх болсон шалтгаанаа “Төр болон үндэсний аюулгүй байдалтай холбоотой хэргийг нийгэмд авлига, албан тушаалын төлөө юм шиг ойлгуулж ирлээ. Урьд нь миний ярьж хэлсэн зүйлс бүгд үнэн. Одоогоор найман удаа тайлбар мэдүүлгийг хууль хяналтын байгууллагад өгсөн. Гэвч нотлох баримт устгагдсан мэтээр гадуур цуурхал гарч байгаад тайлбар хийе” хэмээн тайлбарласан юм.

60 тэрбумын мэдээллийг дэлгэсэнтэй холбогдуулж түүнийг Тагнуулын байгууллага шалгасан, уулзалтад байсан хүмүүсийн дуу хоолой мөн, дээрх бичлэг эвлүүлэг биш байна гэж дүгнэлт гарсан гэлээ.

Шүүх шинжилгээний газарт шинжлүүлж үзэхэд уг материал дотор аудио бичлэгээс гадна видео бичлэг хавсаргасан байсан. Аудио бичлэгийг олон нийтэд сонсгохоор дэлгэсэн байтал яаж яваад видео болоод Авлигатай тэмцэх газраас Шүүхийн шинжилгээний хүрээлэнд хүргэгдсэнийг мэдэхгүй байна. Шүүхийн шинжилгээний хүрээлэнгийн шинжээч Мөнхбаатар дүгнэхдээ аудио бичлэгийн хувьд эвлүүлэг ороогүй, харин видео гэх файлд монтаж, эвлүүлэг хийсэн байна хэмээн дүгнэлт гаргасан гэж Г.Доржготов хэлэв.

Шударга ёсыг тогтооно, хариуцлага тооцно, бурууд нүд хурц байна” гэж мэдэгдэж байсан Ерөнхий сайд, Засгийн газрыг аврах, түүн рүү чиглэсэн бууны хошууг өөр тийш нь хандуулахын тулд “60 тэрбумын хэрэг” хэвлэлийн хурлаар дахин гарч ирсэн бололтой

“60 тэрбумын хэргийг Авлигатай тэмцэх газарт шилжүүлсэн нь буруу, уг хэргийг Үндэсний аюулгүй байдлын зөвлөл рүү шилжүүлж өгөхийг хүсэн Улсын Прокурорын газарт хүсэлт явуулахаар болсон” талаараа энэ үеэр хэлсэн юм. Үндэсний аюулгүйн байдлын зөвлөлийг Монгол улсын Ерөнхийлөгч тэргүүлдэг. Үүнээс үзвэл 60 тэрбумын хэргээр дахин нэг тоглолт гарах бололтой.

Үндсэндээ түүний “гэнэтхэн” гарч ирсэн нь цаанаа сэжигтэй. Тэрээр энэ хэвлэлийн бага хурлаараа ямар нэгэн шинэ баримт дэлгэсэнгүй. Нэгэн орчуулагчийн онигоо байдагчлан “Нээх онц сонин юм” ярьсангүй.

Харин түүний ийн гарч ирсэн нь өчигдрөөс эхлэн Ерөнхий сайд У.Хүрэлсүхийн Засгийн газрын гишүүдийг тойрсон жижиг дунд үйлдвэрийн зээлтэй холбоотой гэж эх сурвалж хэллээ. Энэ нь ортой байх. Тухайлбал, УИХ-ын гишүүн Х.Болорчулууны “Дорнод гурил”, УИХ-ын гишүүн Г.Солтаны “Монгол Шаазан”, Зам тээвэр, хөгжлийн сайд Я.Содбаатарын “Эпато анарваан”, ХХАА-н сайд Б.Батзоригийн  компаниуд Жижиг, дунд үйлдвэрлэлийг хөгжүүлэх сангаас 950 саяас 1 тэрбум 200 сая төгрөгийн хөнгөлөлттэй зээлийг авсан тухай мэдээлэл нийгэмд шуугиан тариад байгаа. “Шударга ёсыг тогтооно, хариуцлага тооцно, бурууд нүд хурц байна” гэж мэдэгдэж байсан Ерөнхий сайд маань хариуцлагагүй гишүүд, сайддаа ямар хариуцлага тооцох бол гэсэн хүлээлт нийгэмд үүсээд байгаа нь нууц биш. Иймээс Засгийн газрыг аврах, түүн рүү чиглэсэн бууны хошууг өөр тийш нь хандуулахын тулд “60 тэрбумын хэрэг” хэвлэлийн хурлаар дахин гарч ирсэн бололтой.

Улс төрийн судлаачдын зүгээс 60 тэрбумын хэргийг 2020 оны сонгуульд АН-ынхан ярьсаар орох нь гарцаагүй хэмээн үзэж байгаа. Ер нь АН ч бай, МАН ч бай аль аль нь өөрт ашигтайгаар уг хэргийг өнхрүүлэн тоглож байгаа нь Г.Доржзодов нар дахин гарч ирснээс харагдаж байна гэж хэлж болно. Учир нь 60 тэрбумын хэрэг манай улс төрчдийн нэгнээ намнадаг жирийн “кэйс” болсон шүү дээ.

 

---