АНУ-ын Ерөнхийлөгч Дональд Трамп Дэлхийн эрүүл мэндийн байгууллагын үйл ажиллагаанд сэтгэл дундуур байгаагаа илэрхийлээд байсан бол энэ удаад доорх албан тушаалтнууддаа тус байгууллагад үзүүлдэг санхүүжилтээ зогсоох зааварчилгаа өгсөн гэдгээ мэдэгджээ.

АНУ нь ДЭМБ-ын сайн дурын бие даасан хамгийн том санхүүжүүлэгч бөгөөд нийт төсвийн 15 хувийг санхүүжүүлдэг байна. 2019 онд тус байгууллагад 400 сая ам.долларын сан бүрдүүлжээ.

Трамп тус байгууллагыг дэлхийн нийтийг хамарсан коронавирусийн халдвартай тэмцэхэд хүлээх ёстой суурь үндсэн үүрэг хариуцлагаа умартсан хэмээн буруутгажээ. НҮБ-ын салбар ДЭМБ нь коронавирус Хятадад тархсаны дараа түүнийг зогсоож чадаагүй ба зохион байгуулалтгүй ажилласан тул хариуцлагаа хүлээх ёстой хэмээн анхааруулсан байна.

Өнгөрсөн долоо хоногт хийсэн мэдэгдэлдээ Ерөнхийлөгч Трамп ДЭМБ-ыг Хятадад хэт төвлөрч байна хэмээн шүүмжилсэн билээ. Америк коронавирусийн халдварын дэлхийн хамгийн том голомт болоод байгаа бөгөөд 613,886 хүн халдварлаж, 26,047 иргэн нас бараад байна.

Трампын үзэж байгаагаар ДЭМБ тахал Ухань хотод илэрсэн даруйд ажлаа сайн гүйцэтгэсэн бол дэлхийн мянга мянган иргэний амь насыг аварч, 200 гаруй улсад тархахгүй байсан гэжээ. Гэвч Трампыг гадагшаа анхаарлаа чиглүүлж байх хооронд улс оронд нь халдвар гамшгийн хэмжээнд аюул дагуулж байна хэмээн шүүмжлэгчид буруутгаж байгаа юм.

Эх сурвалж: ВВС

---