БНСУ-д коронавирусийн халдварын 10,000 гаруй тохиолдол илэрч, 222 хүн нас барж, 7,500 гаруй хүн эдгэжээ. Гэвч халдвар аваад эдгэсэн зуу гаруй иргэнд хоёр дахь шатны шинжилгээгээр коронавирус дахин илэрсэн байна.

Халдварын тархалт харьцангуй тогтворжсон гэж үзэж байгаа тул нийтээс зай барих дүрмийг иргэд огоорох шинж ажиглагдаад байгаа юм. Өмнөд Солонгост тогтоосон хорио цээрийн дэглэм энэ сарын 19-ний өдөр хүртэл үргэлжлэх ажээ.

Ёнхап агентлагийн мэдээлснээр Өмнөд Солонгос улсад нийт 116 өвчтөнөөс коронавирусийн халдвар дахин идэвхжсэнийг тогтоосон байна. Эдгээр хүмүүсийн 48 нь халдварын голомт болсон Тэгу хотын оршин суугчид байгаа ажээ.

Солонгосын халдварт өвчнөөс урьдчилан сэргийлэх, хяналтын төвийн захирал Жон Үн Кёны мэдэгдсэнээр тэдгээр хүмүүст вирусийн халдвар бүрэн устаагүй идэвхгүй байдалд шилжиж эргэн идэвхжсэн гэж үзэж байна.

Өнгөрсөн долоо хоногт тус улсад вирус дахин идэвхжсэн 51 тохиолдол гарсныг мэдээлж байсан юм.

Эх сурвалж: Fox News  

---