Энэтхэг улсын Пунжаб мужид коронавирусээс сэргийлэх хорио цээрийн дэглэм сахиулахыг оролдсон цагдаагийн ажилтнуудын гарыг сэлмээр цавчиж, хүндээр шархдуулсан тохиолдол ням гарагт гарчээ.

Цагдаа нарын шаардлагыг биелүүлэхээс татгалзсан этгээдүүд Пунжаб мужийн цагдаагийн газрын дэд мөрдөгчийн туслах Харжит Сингхийн зүүн гарыг тасалж, найман цаг үргэлжилсэн хагалгааны дараа эмч нар бугуйг нь буцааж нийлүүлсэн байна.

Уг халдлагын үеэр Харжит Сингхээс гадна зургаан офицер шархаджээ. Автомашинтай явж байсан долоон эрэгтэй замын хаалт дээр зогсоход цагдаа нар тэднээс аяллын тусгай зөвшөөрлөө үзүүлэхийг хүссэн байна. Энэ хооронд машинд байсан этгээдүүдийн нэг сэлэм гаргаж ирэн Сингхийн гарыг огтолжээ.

Шархадсан офицеруудын нэг нуруундаа сэлэмний шарх авсан байна. Үйл явдлын дараа мужийн захиргаанаас ард иргэдэд хандан анхааруулга өгч Засгийн газрын тогтоосон хөл хорионы дэглэмийг чандлан сахиж, цагдаа нарын шаардлагыг биелүүлэхийг хүсчээ. Сэжигтнүүдийг баривчлан саатуулсан ба хэргийн мөрдөн шалгах ажил үргэлжилж байна.

Энэтхэг улсад коронавирусийн 10,000 орчим тохиолдол бүртгэгдэж 300 гаруй иргэн нас баржээ. Пунжаб мужид 200 орчим халдварын тохиолдол бүртгэгдэж 11 иргэн тус халдвараар амиа алдаад байна.

Эх сурвалж: CNN

---