Алдарт Beatles хамтлагийн гишүүн Пол МакКартнийн зохиосон “Hey Jude” дууны үгний гар бичмэлийг дуудлага худалдаагаар заржээ. МакКартнийн өөрийн гараар бичсэн үг дуудлага худалдаан дээр 731,000 фунт стерлинг буюу бараг сая ам.долларын үнэ хүрчээ.

Дуудлага худалдааг зохион байгуулагчид гар бичмэлийг дээд тал нь 128,000 фунт стерлинг хүрнэ гэж таамаглаж байсан ч нэрээ нууцалсан худалдан авагч бараг зургаа дахин илүү үнээр худалдаж авсан байна.

“Hey Jude” дууг хамтлагийн дуучин Жон Леннон анхны эхнэр Синтиагаас салах үед 1968 онд Пол МакКартни тэдний хүү Жулиан Леннонд зориулан бичсэн нь бүх цаг үеийн хит дуу болсон түүхтэй. МакКартни, Жулиан нар ойр дотно байсан бөгөөд машинаасаа дөнгөж буугаад түүнийг хараад л өөрийн эрхгүй аманд нь “Hey Jules, don’t make it bad…” хэмээн орж ирсэн гэдэг.

Түүнчлэн дуудлага худалдаагаар хамтлагийн Умард Америк дахь анхны аялан тоглолтыг нээж байсан басс бөмбөрийг 161,000 фунт стерлингээр заржээ. Мөн Жон Леннон, Ёко Оно нарын Вьетнамын дайныг эсэргүүцсэн “Bagism” зураг 75,000 фунт стерлингийн үнэ хүрчээ.

Эх сурвалж: ВВС

---