Дэлхийн 213 улс, тусгай бүсэд Ковид-19 коронавирус бүртгэгдсэн ба 1,7 сая иргэн халдвар авсны 1,2 сая нь эмнэлэгт хэвтэн эмчлүүлж байна.

Япон улсад коронавирусийн халдварын 372 шинэ тохиолдол сүүлийн нэг хоногт бүртгэгдсэнээс Токиод 152 шинэ тохиолдол илэрчээ. Харин БНСУ-д 37 шинэ тохиолдол бүртгэгдсэнээс 12 нь гаднаас тээвэрлэгдэн орж иржээ.

Хөрш ОХУ-д өвчлөл нэлээд эрчтэй тархаж байгаа бөгөөд 24 цагийн дотор 1,000 гаруй хүн шинээр халдвар авчээ. Улаан-Үдэд 61 хүн, Эрхүүд 24, Тувад нэг тохиолдол бүртгэгдээд байна. ОХУ-д 4, 5 дугаар саруудад өвчлөл оргил үедээ хүрнэ гэж судлаачид үзэж байгаа тул шинээр байгуулж байгаа эмнэлгийн орыг 900 болгон нэмж, Анагаах ухааны чиглэлээр сурч байгаа оюутан, залуу эмч нарыг бэлэн байдалд оруулжээ. Мөн хол хорио, хязгаарлалтын дэглэмийг үргэлжлүүлэх, эмнэлгийн ажилтнуудыг амьсгалын аппаратан дээр ажиллах сургалтууд зохион байгуулж байна.

ОХУ-ын нийслэл Москва хотод ирэх долоо хоногийн лхагва гарагаас эхлэн ард иргэд гэрээс зайлшгүй гарах шаардлагатай бол холбогдох хүмүүст мэдэгдэл хүргүүлж байж гарах дүрэм хэрэгжиж эхэлнэ.

Манай улсад коронавирус халдварын 16 тохиолдол зөөвөрлөгдөн орж 4 хүн эмнэлгээс гарсан.

Бямба гарагаас эхлэн коронавирусийн улмаас нас барсан иргэдийн тоогоор АНУ дэлхийд тэргүүлж эхэллээ. Дараа нь Итали, Испани улсууд орж байна. Испани улс халдварын тохиолдлоор Европ тивд тэргүүлж байна.

Өвчлөл анх Уханиас эхлэхдээ эмнэлгийн орчинд эхэлж тархсан учир манай иргэд аль болох эмнэлгээр явахгүй байх, нэг хүнийг дагаж олон хүн эмнэлэгт очихгүй байх, заавал эргэх шаардлагагүй гэдгийг хэлж байна. Коронавирусийн халдварын өвчлөлийн 40-60 хувь нь 40-өөс доош насны залуучууд байгаа нь хоёр дахь давлагаа залуучуудыг илүүтэй өвчлөхөд хүргэж байгааг судлаачид сэрэмжлүүллээ. ДЭМБ-аас хөл хориог гэнэт тавьж болохгүй гэдгийг анхааруулсаар байна.

2020 оны 4 дүгээр сарын 11-ны байдлаар ХӨСҮТ 108 шинжилгээ хийсэн бөгөөд СӨҮЛ-Улаанбаатарын чиглэлийн 99 шинжилгээ, 9 тандалтаас коронавирус илрээгүй байна.

Алтанбулагийн боомтоор хил давж ирсэн иргэдийн 169 нь Улаанбаатар хотдод ирсэн, Сэлэнгэ аймагт 2, үлдсэн нь Дархан-Уул аймагт байна.  Нийслэлд ирсэн иргэдийн 149 нь "Амар" зочид буудалд үлдсэн 20-ийг ХӨСҮТ-д тусгаарлан тандаж байна. Алтанбулагаас ирсэн хүмүүсийн шинжилгээг хийж байгаа ба хариу нь өнөөдөр гарна. Халдвартай 12 хүний биеийн байдал тогтвортой, эмчилгээ сайн явагдаж байна гэж үзэж байна.

Гэрээр тусгаарлагдсан хүмүүсийн хяналт маш сайн байгаа. Гэрт тусгаарлагдаж байгаа хүвь хүн үүрэг хариуцлагаа сайн ухамсарлаж, ойр дотны хүмүүс нь хянах хэрэгтэй. Өөрөө өөрийгөө хянаж, өөрөө өөртөө үнэнч байх ёстой гэдгийг сануулж байна. Бусад улс орнуудад цэрэг цагдаагийн хүч ашиглаж хорио цээрийн дэглэмийг хэрэгжүүлж байгаа бол манай улсад тусгаарлах журмыг даган мөрдөж харьцангуй энх тайван замаар халдварт өвчнөөс сэргийлж байна гэдгийг онцоллоо.

---