Коронавирус дэлхийн 210 улс, тусгай бүсэд бүртгэгдэж 1,7 сая иргэн халдварлаж, 108,000 гаруй хүн нас баржээ. АНУ дэлхийн бусад улс орнуудыг халдварын тохиолдлоор тэргүүлж байсан бөгөөд нийт 20,577 хүн нас барснаар Италийг давжээ. Америкт коронавирусийн халдварын 533,000 тохиолдол бүртгэгдээд байгаа юм. Харин Итали улсад Ковид-19-өөр 152,271 иргэн халдварлаж, 19,468 хүн нас барлаа.

АНУ хоногт 2,000-аас дээш хүн коронавирусээр нас барсан анхны улс болсныг Жон Хопкинсын их сургуулийн судалгаагаар харуулжээ. Энэ хооронд Америкт халдварын голомт болсон Нью-Йорк мужийн захирагч Эндрю Куомо бямба гарагт мэдэгдэхдээ нас барагсдын тоо харьцангуй тогтворжсон гэж мэдэгдсэн байна. Тус мужид халдварын 180,000 гаруй тохиолдол бүртгэгджээ.

Түүнчлэн Америкийн муж бүр халдварт тахалтай гамшгийн хэмжээнд тэмцэхээ зарласан байна. Улаан өндөгний баяр тохиож буй тул христийн шашинтай улс орнууд хорио цээрийн дэглэмийн дор баярын өдрүүдийг өнгөрүүлж байна.

Эх сурвалж: ВВС

---