БНСУ-д энэ сарын 15-нд болох 21 дэх удаагийн парламентын сонгуулиар иргэдийг санал өгөхийг уриалан, тус улсын олны танил одод Сонгуулийн ерөнхий хороотой хамтарсан уламжлалт сурталчилгааны ажилд ямар ч үнэ төлбөргүй оролцож байна.

Гэвч энэ жил дэлхийн даяар тархаад буй коронавирусийн улмаас тэд төлөвлөсөн ёсоор хамт бичлэг хийх боломжгүй болжээ. Харин оронд нь Сонгуулийн ерөнхий хорооноос эдгээр олны танил хүмүүст тус бүрт нь "сонгуулийн бэлгийн багц"-ыг илгээж, одууд гэртээ өөрсдөө бичлэгээ бичин цахим ертөнцөөр тарааж байна.

Уг бэлгийн хайрцгуудад “No Vote No…” гэсэн бичигтэй футболк байх бөгөөд одууд өөрсдийн хүссэн үгийг хоосон зайд нөхөн бичиж, “Сонгуульгүй ертөнц ямар байх вэ?” сэдвийн хүрээнд үзэл бодлоо илэрхийлэв. Жишээлбэл, алдартнууд "Сонгуульгүй бол бид ч байхгүй", "Сонгуульгүй бол итгэл найдвар байхгүй", "Сонгуульгүй бол эрх чөлөө байхгүй" хэмээн бичжээ.

Оддын бичлэгүүд гуравдугаар сарын 16-наас эхлэн өдөрт нэг нэгээр Сонгуулийн ерөнхий хорооны албан ёсны YouTube, сошиал хуудас, портал сайтуудаар тараагдаж эхэлсэн бөгөөд сонгуулийн санал хураах өдөр хүртэл үргэлжилнэ.

Эх сурвалж: news.chosun.com, osen.mt.co.kr

---