Эрүүл мэндийн яамнаас коронавирусийн халдварын талаарх цаг үеийн мэдээллийг хүргэж байна. Дархан-Уул, Орхон аймагт тусгаарлагдсан иргэд коронавирусийн халдваргүй нь тогтоогдсон гэж газрын дарга Д.Нарангэрэл мэдээлэв.

Бельги улсад анхны тохиолдол бүртгэгдсэн 

ДЭМБ-ын мэргэжилтэн О.Ариунтуяа: Өглөө 08:00 цагийн байдлаар дэлхий даяар коронавирусийн халдвар авсан хүний тоо 28,261 болж, нас барсан хүний тоо 565 болж нэмэгдсэн байна. Харин халдвар аваад бүрэн эдгэрсэн хүний тоо 911 болжээ. Бельгид анхны тохиолдол бүртгэгдээд байна. Анх Хятадаас гадна Тайландад анхны тохиолдол бүртгэгдсэнээс хойш одоогийн байдлаар 24 улсад бүртгэгдсэн ч хилийн хяналтыг сайжруулснаар халдварыг гартаа авч дэлхийн хэмжээний дэгдэлт болохоос сэргийлж чадсан. Нийт тохиолдлын 80 хувь нь хөнгөн явцтай байна.

ДЭМБ-аас эмч, эмнэлгийн ажилтнуудын аюулгүй байдлыг хангах хувийн хамгаалах хэрэгслийн нөөцийг бүрдүүлэн ажиллаж байгаа. Манай улсад хоёрдугаар сарын 8-нд хувийн хамгаалах хэрэгслийн эхний ээлж ирнэ.

Өнөөдрөөс зөвхөн төмөр зам, агаарын замаар зорчигч тээвэр явж эхэлнэ 

ЗТХЯ-наас зам, тээврийн салбарт хэрэгжиж байгаа зохицуулалтуудыг танилцууллаа.

Иргэний нисэхийн салбарт БНХАУ-руу аялах нислэгүүдийг цуцлаад байна. Тодруулбал, нэгдүгээр сарын 3, хоёрдугаар сарын 20, гуравдугаар сарын 2 нийт 25 нислэгийг цуцалсан.

Галт тэрэг ням гарагаас бусад өдрүүдэд цагийн хуваарийн дагуу явж байна. Бээжин-УБ-Москва чиглэлийн галт тэргийг ОХУ-ын хүсэлтээр өнөөдрөөс эхлэн цуцалсан.  Монгол Улсын иргэдийг зайлшгүй ажилтай биш бол хилээр гаргахгүй байгаа.

Нэгдүгээр сарын 27-ноос эхлэн авто замын боомтуудын үйл ажиллагааг хязгаарлаж эхэлсэн. Өнөөдрөөс зөвхөн төмөр зам болон агаарын замаар зорчигч тээвэр явна.

ХӨСҮТ-д долоон сэжигтэй тохиолдолтой иргэнийг тусгаарлан тандалт хийж байна  

ХӨСҮТ-ийн ерөнхий захирал Д.Нямхүү: Хоёрдугаар сарын 4-нд Дархан-Уул аймагт нэг, ХӨСҮТ-д хоёр хүн тусгаарлагдсан. Шинжилгээний хариу гарсан, коронавирусийн халдвар илрээгүй. Орхон аймагт тусгаарлагдсан сэжигтэй тохиолдлын шинжилгээний сорьц өнөөдөр ирнэ, маргааш шинжилгээний хариу гарна.

Хоёрдугаар сарын 5-ны байдлаар 7 сэжигтэй тохиолдол тусгаарлагдан, эмчийн хяналтад тандалт судалгааг хийж байна. Иргэд 80086829 утсаар 24 цагийн турш мэдээлэл авах боломжтой. Ойрын өдрүүдэд шуурхай утас руу залгах хүний тоо буурч байгаагаас харахад иргэд коронавирусийн халдварын талаар ойлголттой болж буй бололтой.

---