Чингэлтэй дүүргийн прокурорын газар тус дүүргийн цагдаагийн нэгдүгээр хэлтэстэй хамтран гуравдугаар сарын 27-ны өдөр хамтарсан шалгалт хийжээ. Шалгалтын үеэр тус дүүргийн I хороонд байрлах орон сууцны нэг давхарт мөрийтэй тоглоомын газар байгуулан тоглож байсан долоон иргэнийг илрүүлсэн байна. Тус байр нь 5-6 өрөөтэй өрөө тус бүрийг мөрийтэй тоглоом тоглоход тохижуулсан байжээ.

Чингэлтэй дүүргийн Прокурорын газрын орлогч прокурор Т.Оргил-Очир “Гуравдугаар сарын 27-ны 23:00 цагийн үед Гэмт хэрэг зөрчлөөс урьдчилан сэргийлэх ажлын хүрээнд хамтарсан шалгалтыг явуулсан. Чингэлтэй дүүргийн I хороонд байрлах найман айлын байранд эрүүгийн хуулийн тусгай ангийн 20.17 дугаар зүйлд зааснаар мөрийтэй тоглоом зохион байгуулах гэмт хэргийн шинжтэй байж болзошгүй дуудлага аван цагдаагийн бие бүрэлдэхүүн прокурорын хяналтан дор мөрдөн шалгах үйл ажиллагаа явуулав” гэсэн юм.

Эрүүгийн хуулийн 20.17 дугаар зүйлд Үр дүнг нь урьдчилан төсөөлөх боломжгүй аз туршиж тоглодог хуулиар хориглосон мөрийтэй тоглоомын газар байгуулсан эсвэл ажлуулсан бол 5400 нэгжээс 27 мянган нэгжтэй тэнцэх хэмжээний төгрөгөөр торгох эсвэл нэг жилээс таван жил хүртэлх хугацаагаар хорих ял онооно гэж заасан байдаг.

---