Коронавирус /Ковид-19/-ын цар тахалаас урьдчилан сэргийлэх, эрсдэлийг бууруулах, биечилсэн харилцааг багасгах үүднээс аж ахуйн нэгжүүд нийслэлийн харьяаны 1050 байгууллагуудтай онлайнаар  цахим албан бичгийг илгээх, солилцох боломж бүрдсэн байна.  

Цахим албан бичиг солилцохын тулд тоон гарын үсгээр баталгаажсан “Смарт оффис” системийг ашиглах юм. 

Нийслэлийн Засаг даргын Тамгын газрын харьяа нутгийн захиргааны байгууллагууд нь 2016 оноос эхлэн Албан хэрэг хөтлөлтийн “eDoc” системийг нэвтрүүлж, нийт байгууллагууд энэ хугацаанд 800 мянга орчим албан бичиг цахимаар солилцжээ.

Албан бичгийг нэг байгууллагаас нөгөө байгууллага руу цаасаар буюу шуудангаар илгээхэд 1-3 хоног, хүргүүлэх зардал 1500 төгрөг байдаг. Харин цахим хэлбэрээр албан бичиг солилцож эхэлснээр бичиг хэргийн болон шуудангийн зардлыг 40 хувиар бууруулсан байна.

“Смарт оффис” системийг ашиглахын тулд аж ахуйн нэгжүүд Тоон гарын үсгийн Гэрчилгээ олгогч байгууллагаас тоон гарын үсгийн гэрчилгээ авсан байх шаардлагатай бөгөөд https://smartoffice.mn эсвэл нийслэлийн http://ulaanbaatar.mn/ цахим хуудасруу хандаж “Албан бичиг” гэсэн хэсгийг сонгон бүртгүүлснээр хандах эрхтэй болно.

Энэхүү ажлын хүрээнд аж ахуйн нэгжүүд нь тоон гарын үсгийн Гэрчилгээ олгогч байгуулагаас олгосон Тоон гарын үсгийн е-Токен төхөөрөмжөө ашиглан, “Смарт Оффис” /https://smartoffice.mn/ системээр дамжуулан нийслэл, дүүргийн харьяа байгууллагууд руу болон өөр хоорондоо албан бичиг илгээх, хүлээн авах, хянах боломжтой юм.

Албан бичиг солилцоход хэд хэдэн шаардлага тавигдаж байгаа аж. Үүнд:

-ААН нэг л эрх эзэмшинэ

-Системд дамжуулах файл зөвхөн pdf өргөтгөлтэй байх

-Дамжуулах файл дээрээ зөвхөн нэг л тоон гарын үсэг  зурж баталгаажуулсан байх ёстой

-Системээр зар сурталчилгаа явуулахыг хориглоно.

---