Шуурхай комиссын өнөөдрийн хуралдаанаар ГХЯ, ОБЕГ, МХЕГ-уудад авч хэрэгжүүлж байгаа арга хэмжээний талаар дэлгэрэнгүй мэдээлэл өглөө. 

ГХЯ-ны Консулын хэлтсийн дарга Л.Мөнхтүшиг: 

-МИАТ компанийг авлига авч гадаадаас иргэдийг ялгавартай авчраад байна гэж яриад байгаа. МИАТ авлига аваагүй. Гадаадад буй ЭСЯ-ны Консулын хэлтсүүд онлайнаар үйлчилгээ үзүүлж байгаа. Гэтэл ЭСЯ-ны гадаа иргэд бөөгнөрч байгаа нь өөрсдийн эрүүл мэнддээ хүндрэл учруулж байна.

Сөүл дэх ЭСЯ-ны консулын газрыг утсаа авахгүй байна гэсэн гомдол маш их ирсэн. Консулын газрын таван ажилтан 24 цагаар ажиллаж, иргэдэд утсаар зөвлөгөө, мэдээлэл өгч байгаа. БНСУ-д манай 48 мянган иргэн бий. Шинээр дуудлага орж ирэхэд хүлээх горимд оруулдаг. Энэ нь утсаа авдаггүй гэсэн хардлагад хүргээд байгаа бололтой. БНСУ-д манай улсын 48 мянган иргэн ажиллаж, амьдардаг. Хүн тус бүрт хүрч ажиллахад хүндрэлтэй байна. 

Монгол улсын 5600 иргэн эх орондоо ирэх хүсэлтээ гаргасан. Тэр дундаа АНУ-аас ирэх хүсэлтэй 1000 иргэн бүртгүүлсэн. Иргэдийг газар, газраас нь авах боломжгүй гэдгийг Ерөнхий сайд хэлсэн. Гэхдээ боломжит байдлыг судалж байна. Яаж ийж байгаад БНСУ, Японд очъё гэсэн хандлага байна. Энэ бол буруу. БНСУ-ын гадаадын иргэдийг 14 хоног тусгаарлана, нэг өдрийн зардал 100 мянган вон байна. Иргэдийг өөрсдийг нь төл гэж шаардаж байгаа. Мөн, зарим нисч ирсэн гадаадын иргэдийг ирсэн газар руу нь шууд буцааж байгаа. 

Өнгөрсөн бямба гарагт БНСУ-ын тал өөрсдийн иргэдээ тусгай үүргийн онгоцоор татаж авсан. Бид хүсэлт гаргаж, 111 нь манай улсын иргэнээ, тэр дундаа БНСУ-д суралцах оюутнуудаа нисгэсэн. 

Хүсэлтээ гаргасан Монгол улсын хамгийн сүүлийн иргэн эх орондоо ирэх хүртэл дипломат алба ажиллах болно. 

МХЕГ-ын дэд дарга Г.Сугарбат: 

-Гадаадын иргэд, тэр дундаа хүнс тээвэрлэж ирж байгаа гадаад улсын жолооч нарыг Монголд маш богино хугацаагаар байлгаад, буцаах бодлого хэрэгжүүлж байгаа. Гэтэл Эрдэнэт хотод гадаад жолоочийг хонуулсан тохиолдол гарлаа. Ажлын цаг дууссан гэдэг шалтгаанаар бараа хүлээн авагч нь ажиллаагүй. Иймд үүнд анхаарах хэрэгтэй байна. 

Нүүрсний экспорт хэвийн явж байна. Өмнөговийн Шивээхүрэнгийн боомтоор нүүрс тээвэрлэж буй авто хэрэгслийг ариутгалын гурван пунктээр нэвтрүүлж байгаа. 

ОБЕГ-ын дэд дарга, хурандаа Г.Ууганбаяр: 

-2556 иргэн тусгаарлах байрт байна. Өнгөрсөн долоо хоногт 105 иргэн гарсан. 14 хоногийн хугацаанд өөрсдийгөө тусгаарлах ёстой. Гэтэл гадуур гарч яваад өвчний халдвар тараах юм бол хууль тогтоомжтой шүү. 

Нийслэлийн хувьд 360 иргэнийг нэг дор хүлээн авах чадвартай. Иймд томоохон зочид буудлуудын эзэдтэй уулзаж, санал тавьсан. Өнөөдөр хариугаа өгнө. Зочид буудлуудыг дайчлахаас өөр сонголтгүй. 

---