УИХ-ын нэр бүхий гишүүд эрх мэдэл, албан тушаалаа урвуулан ашиглаж, ЖДҮДС-аас хувьдаа болон хамаарал бүхий компанидаа зээл авсан нь олон нийтэд ил болсон. Дуулиан, шуугиан дагуулсан энэ хэрэгт холбогдсон 49 гишүүн өнөөг болтол хариуцлага тооцоогүйгээр барахгүй улсад учруулсан хохирлоо нэг нь ч эргүүлэн төлөөгүй байгаа.

Харин “Иргэд хариуцлага нэхэх эрх” ТББ-ын зүгээс ЖДҮ-ийн хэргийг нэхэн сануулж, нэр бүхий УИХ-ын гишүүдэд хариуцлага тооцож, хувьдаа завшсан олон тэрбумаар яригдах мөнгийг ЖДҮДС-нд буцаан төлүүлэхийг шаардаж байгаа юм. Энэ талаар “Иргэдийн нэхэх эрх” ТББ-ын тэргүүн Х.Алтанхуяг урьд нь Хүнс хөдөө хөнгөн үйлдвэрийн яаманд мэдэгдэл хүргүүлсэн ч өнөөдрийг хүртэл шаардлагын хариуг ирүүлээгүй байгаа юм. 

Тэгвэл өнөөдөр МАН-д дээрх шаардлагыг хүргүүлж буйгаа мэдэгдэв. Учир нь ЖДҮДС-гаас зээл авсан эрхмүүдийн дийлэнх нь МАН-ын гишүүд учраас МАН-ын дарга У.Хүрэлсүх зээл авсан гишүүддээ хариуцлага тооцож, намын гишүүнээс хасах, УИХ-д нэр дэвшүүлэхгүй байх арга хэмжээ авч ажиллах шаардлагыг хүргүүллээ. 

“Иргэд хариуцлага нэхэх эрх” ТББ ТББ-ын тэргүүн Х.Алтанхуяг "МАН-ын зүгээс УИХ-ын гишүүн асан Н.Номтойбаярт хариуцлага тооцож чадсан шигээ ЖДҮДС-гаас зээл авсан гишүүддээ хариуцлага тооцож чадна гэдэгт итгэлтэй байна" гэсэн юм. 

Уг шаардлагыг МАН-ын хуулийн зөвлөх хүлээн авч холбогдох хүмүүст уламжлахаа мэдэгдэв. 

---