МҮХАҮТ, эдийн засагчидтай хамтран 1500 гаруй компаниас коронавирусийн ажлын байранд үзүүлэх нөлөө судалгааг явуулжээ. 

МҮХАҮТ-аас 14 хоногийн өмнө явуулсан судалгаагаар судалгаанд оролцсон ААН-ийн 4,5 хувь нь ямар нэгэн байдлаар ажлын байраа цомхотгож байна гэж үзсэн бол энэ тоо өнөөдөр 30 хувь болж өсчээ.

14 хоногийн өмнө коронавирус нийт аж ахунй нэгжүүдийн 57 хувьд маш их нөлөө үзүүлж байсан бол өнөөдөр 67,4 хувь болж мөн өссөн. Тэр дундаа аялал жуулчлал, иргэний тээвэр, зочид буудал, хоолны газруудад ихээхэн нөлөөлж байгааг дурджээ.

Энэ судалгааг хийсэн эдийн засагч, санхүүгийн шинжээч Б.Дөлгөөнтэй бид ярилцлаа.

Түүний хэлж буйгаар коронавирусийн улмаас эдийн засагт үүсээд буй хүндрэлийг арилгах арга хэмжээ авалгүй энэ хэвээр явбал 260 мянган хүн ажилгүйчүүдийн эгнээнд шилжихэд ойрхон байна. Мөн гурван сарын дараа эдийн засагт хүндэрч, бүр шок болоход ойрхон байна.

Эдийн засагч Б.Дөлгөөн:

-Коронавирус эдийн засагт ямар нөлөө үзүүлж байгаа дээр яг тодорхой дүн шинжилгээ хийхгүй байна. Эрүүл мэндийн тал дээр сайн арга хэмжээ авч байгаа ч эдийн засгаа орхигдуулж байна.

Үүний улмаас долоо хоногийн өмнө л гэхэд 5000 аж ахуйн нэгж хаалгаа барьсан байна. Эдийн засгаа орхигдуулж байгаа учраас сөрөг нөлөө нь иргэд, аж ахуйн нуруун дээр буугаад байна.

Өнөөдөр арга хэмжээ авахгүй бол гурван сарын дараа хэдэн мянган аж ахуйн нэгж хаалгаа барих нөхцөл үүснэ. Бүр хэтэрхий оройтсон ч байж магадгүй.

Машинаар бодвол сэнсийг эргүүлдэг ремен тасрахад ойрхон байна. Ремен тасарвал мотор цохино. Тэгээд машин явахгүй. Үүнээс л сэргийлэх хэрэгтэй...

---