Манай улсад анхны коронавирусын халдварыг тээж ирсэн Франц улсын иргэн ХӨСҮТ-д эмчлүүлж байгаа билээ. Түүний биеийн байдал харьцангуй сайн байгаа гэж ЭМЯ мэдэгдээд буй. Тэгвэл "Арева" ХХК-ийн ажилтан тэрбээр дараах захидлыг илгээжээ. 

Захидалд 

"Хүндэт Оюунцэцэг дүү сайн байна уу?

Юуны түрүүнд надад сэтгэлийн дэмжлэг үзүүлж захидал бичсэн Оюунцэцэг чамд маш их баярлалаа. Би Монголд COVID-19 вирусийн халдвар илэрсэн анхны хүн болсондоо маш ихээр гуниглаж байна. Гэвч надтай ойр байсан хүмүүсийн шинжилгээний хариу бүгд сөрөг гарсныг сонсоод сэтгэл минь маш их хөнгөрлөө.

Мөн чиний захидлыг уншаад би маш ихээр догдоллоо. Чиний үгүүд миний сэтгэлийг хайр, талархлаар дүүргэж, Монголын ард түмэн цэлмэг тэнгэр шигээ ямар агуу, өгөөмөр ард түмэн юм бэ гэдгийг улам ихээр мэдэрлээ.

Захидал, илгээмж илгээсэн бусад бүх хүмүүстээ ч бас баярлалаа. Сүүлийн хэдэн хоног миний дэргэд байж, бүхий л сэтгэлээрээ надад туслалцаа дэмжлэг үзүүлсэн, мөн үзүүлсээр байгаа эмч, сувилагч нартаа маш их баярлаж байна.

Би тэдний гаргаж буй зориг, сэтгэлийн ачийг хэзээ ч хариулж чадахгүй байх. Тэдний ачаар эсэн мэнд гэр бүлтэйгээ уулзаж чадна гэдэгтээ итгэлтэй байна. Бүрэн эдгэрснийхээ дараа Оюунцэцэг чамтай ч мөн уулзаж, талархлаа өөрийн биеэр илэрхийлэхийг хүсэж байна.

Монголын ард түмэн болон намайг эмчилж сувилж байгаа ачит эмч нартаа аз жаргал, эрүүл энхийг хүсэхийн зэрэгцээ чин сэтгэлийн ерөөлтэй захидал бичиж дэмжсэн Оюунцэцэг дүү чамд мөн аз жаргал, эрүүл энх, сурлагын өндөр амжилтыг ерөөе!

Захидал бичсэнд дахин баярлалаа" гэжээ. 

Дашрамд дурдахад манай улсын Дорноговь аймгийн нутаг дэвсгэрт үйл ажиллагаа явуулдаг, уг Франц иргэний ажилладаг “Орано Майнинг” компанийн зүгээс өөрийн ажилтанд нь эрүүл мэндийн эмчилгээ, үйлчилгээг дээд зэргээр үзүүлж байгаад талархал илэрхийлэн, Улсын онцгой комисст нэг тэрбум төгрөгийн хандив өргөж байгаагаа өчигдөр мэдэгдсэн билээ. Мөн Монгол Улсад бүртгэгдсэн коронавируст халдварын анхны тохиолдол болох франц иргэнээс бусдад халдвар тархаагүй байна. 

---