Эдийн засгаа дэмжихийн тулд Орос улсын эсрэг тавьсан хориг арга хэмжээг эцэс болгохыг Германд уриалав. Ийм үзэл бодлыг Бундестагийн олон улсын харилцааны хорооны гишүүн Антон Фризен РИА Новости агентлагтай ярилцахдаа илэрхийлжээ.

Түүний хэлснээр, хориг арга хэмжээнээс татгалзах нь коронавирусын халдвар тархалтын үед эдийн засгаа дэмжихэд Герман улсад тус дэмтэй ажээ. Тэрээр, 2020 онд дотоодын нийт бүтээгдэхүүн нэг хувийн алдагдал хүлээнэ гэж шинжээчид үзэж байгаа талаар өгүүлжээ. Түүнчлэн, хориг арга хэмжээг сунгаснаар германы эдийн засаг сар бүр 667 сая, жилдээ найман тэрбум евро алдаж байна хэмээн Фризен мэдэгджээ.

“Хориг арга хэмжээнээс эдийн засгийн хувьд бүгд хохирдог бол улс төрийн хувьд хэн ч хождоггүй. Энэ оны зургадугаар сард Европын холбооны чуулган дээр хориг арга хэмжээг сунгах асуудал хэлэлцэхэд Герман улс “үгүй” гэж хэлэх ёстой” хэмээн Бундестагийн депутат онцлов. Гагцхүү Орос улстай хамтарч байж л аюулгүй байдал, эдийн засгийн хөгжил боломжтой гэдгийг ухаарч ойлгоход цар тахлаас үүдсэн хямрал тус нэмэр болно хэмээн итгэж байгаагаа Фризен илэрхийлжээ.

Коронавирустэй хийх тэмцлийн суурь дэвсгэр дээр Орос улсын эсрэг тавьсан хориг арга хэмжээг цуцлахыг Бундестагийн олон улсын хорооны гишүүн Дальдемар Гердт мөн урьд нь уриалж байсан. “Бид хөршүүдтэйгээ хамт байж, Орос улстай тогтоосон худалдааны эргэлтээ сэргээх хэрэгтэй” хэмээн Гердт мэдэгдсэн.

Европын холбооны улс орнууд, мөн АНУ болон Украин улс 2014 онд Москвагийн эсрэг эдийн засгийн хориг арга хэмжээг анх тогтоосон. Бүх нийтийн санал асуулгын үр дүнгээр Крымын хойг Орос улсын бүрэлдэхүүнд орсны дараа энэ хэрэг явдал гарсан. Тус хойгийн бүгд найрамдах улс Орос улсад нэгдэж орсныг хууль бус үзсэн бөгөөд гэхдээ Москва эдгээр буруутгалыг няцаадаг. Дараа нь Донбасст гарсан зөрчлийн улмаас 2015 онд мөн хориг тогтоосон. Үүний хариуд хориг арга хэмжээг дэмжсэн улс орнуудаас хүнсний бүтээгдэхүүн импортлохыг Москва хориглосон.

Д.ЭНХЭЭ

---