Итали улс Хятадаас гадна коронавирусийн халдварын хоёр дахь том голомтоор нэрлэгдээд байгаа юм. Тус улс өнгөрсөн 24 цагийн дотор Ковид-19 цар тахлын улмаас хамгийн олон буюу 475 иргэнээ алдаж нийт нас барагсдын тоо 3,000-д хүрлээ.

Тус улсад халдварын 35,713 тохиолдол бүртгэгдсэн байгаагаас 4,000 нь эдгэжээ. Халдвар Ломбарди мужид хамгийн өргөн хүрээтэй тархаж, нөхцөл байдал хүнд байна. Ломбарди мужид өнгөрсөн нэг хоногт 319 иргэн нас баржээ.

Дэлхийн эрүүл мэндийн байгууллагын мэдээлснээр дэлхийн хэмжээнд 218,000 хүн коронавирусээр халдварласны талаас илүү хувь буюу дийлэнх нь Европ, Өрнөдийн Номхон далайн бүс нутагт бүртгэгдээд байна.

Улс орнууд халдварын тархалтыг зогсоохын тулд олон нийтийн үйл ажиллагааг хорих зэргээр хорио цээрийн дэглэм хэрэгжүүлж байгаа ч халдвар авсан байж болзошгүй сэжигтэй иргэд өөрийгөө тусгаарлах, хянах хэрэгтэй гэдгийг ДЭМБ-ын зүгээс анхааруулжээ.

Итали улсын Засгийн газар вирусийн тархалтыг зогсоохын тулд хоёр долоо хоногийн турш хорио цээрийн дэглэмийг хэрэгжүүлж байна. Иргэдийг гэрээсээ гарахгүй байхыг уриалсаар байгаа ч нас барсан тохиолдлууд нэмэгдсээр байгаа юм. Мэргэжилтнүүдийн зүгээс Италийн хүн амын дунд ахмадууд нилээд хувийг эзэлдэг тул нас баралтын тоо их байгаа гэж үзжээ.

Европын бусад орнуудыг харвал Испани улсад 14,000 орчим иргэн халдварлаж 598 хүн нас барсан бол Франц улсад халдварын тохиолдол 16 хувиар нэмэгдэж, 7,730 болжээ. Германд 8,000 гаруй тохиолдол бүртгэгдэж 12 иргэн нас барсан байгаа бол Бельги улсад 14 хүн нас барж 1,500 тохиолдол илрээд байна.

Эх сурвалж: ВВС

---