Сонгинохайрхан дүүргийн эрүүгийн хэргийн анхан шатны шүүх С.Баярмаа, Х.Мөнх-Эрдэнэ нарт сэтгэцэд нөлөөт эм, мансууруулах бодисыг бусдад худалдсан гэх хэргийг хянан хэлэлцээд С.Баярмаад зургаан жилийн хорих ял, Х.Мөнх-Эрдэнэд 5 жилийн хорих ялыг тус тус оноожээ.

Тэдэнд оногдуулсан хорих ялыг Эрүүгийн хуулийн ерөнхий ангийн 5.6 дугаар зүйлийн 4 дэх хэсэгт зааснаар нээлттэй хорих байгууллагад эдлүүлэхээр болсон байна.

“Мөсний хатан хаан” гэх нэрээр хар тамхи, мансууруулах бодис хэрэглэгч, худалдан авагчид болон хууль хяналтын байгууллагын дунд танил болсон иргэн С.Баярмаа нь Түүнийг 2015 онд анх саатуулж, Төв аймгийн мөрдөнд хорьж байсан. Тухайн үедээ хамгийн их хэмжээтэй буюу 93гр “мөс” оруулж ирээд баригдаж байжээ.

Улмаар 2016 оны нэгдүгээр сарын 11-нд Баянзүрх, Чингэлтэй, Сүхбаатар дүүргийн эрүүгийн хэргийн анхан шатны шүүхээр 10 жилийн хорих ялаар шийтгүүлсэн. Түүний хамтрагч Х.Мөнх-Эрдэнэд хоёр жилийн ял оноосон. Х.Мөнх-Эрдэнийн хувьд Өршөөлийн тухай хуульд хамрагдаж байсан ч тэнсэн харгалзах ялтай байх хугацаандаа дахин гэмт хэрэгт холбогдсон тул хоёр жилийн хорих ял оноож байжээ.

С.Баярмаа нь Х.Мөнх-Эрдэнэд даалгавар өгч, БНХАУ-аас есөн удаагийн үйлдлээр нэг килограм орчим “мөс” оруулж ирсэн нь мөрдөн байцаалтын явцад тогтоогдсон байна.

 

---